DILI, 25 novembru 2023 (TATOLI)—Prezidente Tribunál Rekursu (PTR), Deolindo dos Santos, informa tanba kestaun tékniku julgamentu Tribunál Movél suspende no sei funsiona hikas iha fulan janeiru 2023.
Notísia Relevante: Juiz Administradór Afonso : problema konbustivél, tinan ne’e Tribunál Movél laiha
Julgamentu móvel agora suspende hela tanba iha kestaun tékniku balun ne’ebé Konsellu Superiór Majislatura Judisiál sei haree fila-fali hodi organiza ho forma di’ak liután, tanba ne’e suspende ona fulan haat ka neen ona.
“Konsellu organiza ona no aprova ona rezolusaun ne’ebé sei implementa rasik Tribunál móvel no konseillu hanoin ona katak ho aprovasaun sira-ne’e Tribunál Movél sei loké fali hahú janeiru tinan oin,” Prezidente Tribunál Rekursu (PTR), Deolindo dos Santos, relata ba jornalista sira hafoin ramata enkontru ho Xefe Estadu iha Palásiu Prezidensiál, Bairru Pite, sesta ne’e.
Nune’e, espesialmente Tribunál Suai, Baucau, Dili bele funsiona fali Tribunál Movél komesa fali iha tinan oin.
“Bainhira regra sira ne’ebé konsellu aprova ne’e ita komesa implementa ona atu bele kontrola julgamentu Tribunál Movél ne’e di’ak liután,” nia dehan.
Tanba julgamentu móvel nia objetivu ba atu halo hotu prosesu lais lori besik justisa ba povu to’o iha postu sira tanba komunidade hela ho distánsia dook.
Jornalista : Nelson de Sousa
Editór : Cancio Ximenes
