ATAÚRO, 25 novembru 2022 (TATOLI)—Ministru Koordenadór Asuntu Ekonomia, Joaquim Amaral hateten orgaun fiskalizadór hanesan CAC, PDHJ no AIFAESA sei solusiona reklamante Cesta Bázika ne’ebé simu sasán aat no folin la to’o $50 ne’ebé akontese iha Ataúro.
Notísia Relevante: Komunidade Beloi preokupa produtu Cesta Bázika la to’o $50
“Iha área distribuisaun ne’e iha orgaun fiskalizadór sira hanesan CAC, PDHJ no mos AIFAESA, ha’u fiar katak orgaun sira-ne’e sei ajuda komunidade sente katak sira-nia direitu seidauk kumpre tuir lei, sira bele deklara tuir mekanizmu ne’ebé iha. Ne’ebé, hanesan ami sira-ne’ebé koordena programa ne’e kontinua enkoraja ba parte hotu-hotu atu uza mekanizmu sira-ne’ebé iha, atu bele reklama sira-nia direitu,” Governante ne’e hateten ba Agência Tatoli relasiona ho distribuisaun produtu cesta bázika ba benefisiáriu iha suku Beloi ne’ebé simu produtu la to’o $50, iha aldeia Ulu Bemasu, suku Beloi, kinta ne’e.
Membru Governu ne’e enkoraja komunidade sira hotu, liu-liu ba komunidade iha suku Beloi atu reklama ba parte relevante banhira simu produtu Cesta Bázika la tuir direitu.
“Iha munisipiu sira seluk, sira tula ba sasán aat maibe ida-ne’e sira tau ketak kedan, sira fahe de’it mak ida di’ak,” nia dehan.
Totál benefisiáriu Cesta Bázika iha suku Beloi hamutuk 839 bo hosi totál ne’e reklamante hamutuk 39.
Notísia Relevante: PN husu Governu bolu atensaun ba kompañia produtu Cesta Bázika la to’o $50
Jornalista : Mirandolina Barros Soares
Editór : Cancio Ximenes
