DILI, 01 dezembru 2022 (TATOLI)—Primeiru-Ministru, Taur Matan Ruak, kinta ne’e, hala’o enkontru no fó hanoin ba Prezidente Repúblika (PR), José Ramos Horta, atu vizita Estadu ba Singapura ne’e ba oin bele hametin liután relasaun ho Timor-Leste (TL).
“Ohin, enkontru semanál ho Prezidente Repúblika ko’alia uitoan atividade Governu no vizita sira ne’ebé Prezidente Repúblika sei halo ba Singapura,” Xefe Governu ne’e hateten ba jornalista sira hafoin ramata enkontru iha Palásiu Prezidensiál Nicolau Lobato, Bairru Pite, kinta ne’e.
Nia hatutan, vizita ba Singapura di’ak tebes oinsa hametin liután relasaun entre rai rua, tanba investimentu hira mak iha Timor-Leste ne’e, Singapura ne’e nasaun ida-ne’eb’e investe makaas iha Timor-Leste, hanesan foin dadaun Pelican Paradise ne’e Singapura no Malásia no iha tan Marine Square.
Xefe Governu konsidera, vizita Estadu ne’e hametin Timor-Leste nia relasaun entendimentu kooprensaun Timor-Leste nia parseria iha kooperasaun nivél hotu hanesan ekonómiku, polítiku, seguransa no kulturál.
Governu nia pedidu mós liu hosi vizita ne’e oinsá hametin relasaun liu-liu nasaun membru ASEAN.
Notísia Relevante: Prezidente Repúblika kontente simu deklarasaun líder ASEAN
“Ita-nia Prezidente to’o loron sei ba no ita-nia pedidu mak sempre halo oinsá hametin ita-nia relasionamentu liu-liu nasaun membru ASEAN nian. Hanesan ita-boot sira hatene, ASEAN aseita emprinsípiu ita-nia adezaun,” Taur hateten.
Entaun, Xefe Governu ne’e hateten, Timor-Leste halo preparativu hotu servisu hamutuk ho sira di’ak liután, nune’e sira bele tulun no apoiu Timor-Leste nia adezaun ba ASEAN ho lalais.
Enkuantu, tuir ajenda, Prezidente Repúblika, José Ramos Horta, sei hala’o vizita Estadu ba Singapura hahú hosi loron 06-10 dezembru tinan ne’e.
Notísia Relevante: PN aprova pedidu PR Horta vizita Singapura
Jornalista : Nelson de Sousa
Editór : Cancio Ximenes
