COVALIMA, 05 dezembru 2022 (TATOLI)–Diretór Servisu Agrikultura Munisípiu Covalima, Domingos Gusmão, informa konstrusaun irrigasaun Beigui iha suku Lepo, postu administrativu Zumalai ne’ebé seidauk finaliza konstrusaun ameasadu atu kotu tanba dezastre naturál.
Notísia Relevante: Konstrusaun irrigasaun Beigui iha Zumalai atinje ona 50,24%
“Konstrusaun irrigasaun Beigui sei iha prosesu konstrusaun la’o hela, kuaze atu finaliza ona ho kilometru ida ho naruk metru 1000, ita-halo akompañamentu buat hotu la’o di’ak. Maibé, problema mak konstrusaun foun mós ameasadu atu kotu tanba kestaun natureza,” Domingos Gusmão informa ba Agência Tatoli, iha Tabalot, segunda ne’e.
Razaun irrigasaun ameasadu atu kotu, tanba bainhira tempu udan korrenta mota boot hodi hamosu dezastre naturál ho tipu rai halai, nune’e diretór ho administradór postu administrativu Zumalai mós halo ona aproximasaun ho responsavél IGE, I.P.
Hafoin halo aproximasaun ho Institutu Jestaun Ekipamentu, Institutu Públiku (IGE, I.P, sigla portugés) rasik disponivél atu halo normalizasaun irrigasaun Beigui ameasadu foin mak halo konstrusaun maibé problema konvustivél la to’o.
“Ho nune’e, ha’u sei hato’o ba administradór munisípiu Covalima oinsá mak bele hetan konvustivél hodi halo normalizasaun. Tanba, irrigasaun ida agora halo konstrusaun ne’e ameasadu bainhira la halo normalizasaun bainhira mota tun agora bele sobu fali,” nia hateten.
Antes ne’e, iha loron 27 setembru 2022, Administradór Munisípiu Covalima, Francisco de Andrade informa, irrigasaun Beigui iha postu administrativu Zumalai, suku Lepo konstrui hosi kompañia Joel Amor Unipesoál. Lda, ho nia montante orsamentu $89,406.
Notísia Relevante: Kompañia Joel Amor sei konstrui irrigasaun Beigui iha Zumalai
Jornalista : Celestina Teles
Editór : Cancio Ximenes
