DILI, 06 dezembru 2022 (TATOLI)—Prezidente Repúblika (PR), José Ramos Horta, hamutuk ho delegasaun, tersa ne’e, dezloka ba Singapura hahú hosi loron 07-10 fulan-dezembru no sei fila-fali mai iha loron 11 dezembru 2022.\
Notísia Relevante: PM Taur: vizita PR ba Singapura hametin liután relasaun ho TL
“Singapura no Timor-Leste hakesi relasaun diplomátika hahú kedas iha fulan maiu tinan 2002, no Embaixada Timor-Leste nian iha Singapura inaugura kedas iha fulan-dezembru tinan 2010,” refere komunikadu imprensa ne’ebé Agência TATOLI asesu.
Durante vizita Estadu, Xefe Estadu, Ramos Horta, sei hala’o enkontru ho nia omólogu Prezidente Repúblika Singapura, Halimah Yacob, no Primeiru-Ministru Singapura, Lee Hsien Loong.
Primeiru Ministru sei oferese almosu ofisiál ida ba Prezidente Repúblika no delegasaun, no tuir mai banquete/han kalan Estadu ida sei oferese hosi Prezidente Repúblika Singapura ba ninia omólogu Prezidente Timor-Leste, José Ramos Horta.
Prezidente Repúblika sei hala’o mos palestra públika ida iha Institutu Yusof Ishak, ne’ebé sei modera hosi Ministru relasaun exteriór Singapura, Vivian Balakrishnan.
Iha biban hanesan, Prezidente Repúblika Timor-Leste mós sei partisipa iha forum emprezariál, ne’ebé organiza hosi Governu Timor-Leste ho apoiu no partisipasaun hosi setór privadu sira hosi nasaun rua nian.
Ikus liu, Prezidente Repúblika sei halo la’o ain turístiku ida, hodi haleu rezervatóriu ba reaproviamentu bee.
Singapura no Timor-Leste hametin parseira forte tebes ne’ebé hatuur iha valór no objetivu komun sira. Rai rua ne’e mós asina kooperasaun bileterál kona-ba akordu serbisu aéru no Singapura fó ona asisténsia téknika ba Timor-Leste, liu-hosi formasaun ba funsionáriu públiku sira liu 700.
Formasaun hirak ne’ebé ajuda hodi fó kontribuísaun ba dezenvolvimentu rekursu umanu iha Timor-Leste. Aleinde investór sira hosi Singapura barak mós mak investe iha Timor-Leste.
Vizita ida-ne’e nu’udar vizita Estadu ba dalimak hafoin simu investidura nu’udar Prezidente Repúblika Demokrátika Timor-Leste daruak.
Atu fó hanoin mós katak, molok vizita Estadu ba Singapura, Prezidente Repúblika mós hala’o ona vizita ba Estadu Indonézia, Austrália, Portugál no Reinu hosi Kamboja.
Notísia Relevante: PN aprova pedidu PR Horta vizita Singapura
Jornalista : Nelson de Sousa
Editór : Cancio Ximenes
