DILI, 10 dezembru 2022 (TATOLI)—Prezidente Repúblika (PR), José Ramos Horta, hamutuk ho delegasaun, sábadu ne’e, ramata hala’o vizita Estadu ba Singapura no muda urjente ninia programa sei kontinua hala’o vizita Estadu ba Malázia hodi atende konvite hosi Primeiru Ministru Anwar Ibrahim.
Notísia Relevante: PR Horta apresia fórum emprezariál iha Singapura
‘’Horikalan (09/12), ha’u ko’alia ho Primeiru-Ministru Malázia, Anwar Ibrahim, ne’ebé konsidera hanesan amigu bo’ot, tinan lubuk ida-nia laran inklui nia família, nia hatene ha’u mai Singapura, nia foin simu pose hosi liurai boot Malázia, Abdullah Pahang no husu ha’u atu hasoru Nia (Anwar). Maibé ha’u dehan konforme ita-nia tempu no Anwar resposta ba ha’u, sei muda programa atu ita hasoru malu. Tanbá ne’e mak horikalan ha’u deside muda urjente programa,” Xefe Estadu hateten liuhosi komunikadu imprensa ne’ebé Agéncia TATOLI asesu, sábadu ne’e.
PR Horta hateten, Xefe Exekutivu Malázia Anwar Ibrahim, hanesan líder mundiál no estadista koñesidu.
Malázia iha relasaun forte ho Timor-Leste dezde tinan 1999, bainhira exersítu Malázia apoia misaun ONU iha Timor-Leste no Prezidente hakarak reforsa relasaun bilaterál ho Governu Kuala Lumpur-Malázia.
‘’Malázia nia apoia mai Timor-Leste, dezde tempu eís Primeiru-Ministru, Mahathir bin Mohamad, missaun INTERFET no UNTAET. Ha’u sempre hanoin atu hametin liután relasaun ho Malázia, tanba ne’e ha’u muda programa no informa ona ba Prezidente Parlamentu Nasionál, konsulta mós deputadu sira-ne’ebé akompaña mai Singapura, Primeiru-Ministru autoriza Ministra Adaljiza no Joaquim Amaral kontinua viajen traballu ba Malázia,” Horta esplika liuhosi nota ne’e.
Xefe Estadu Horta sei to’o iha Malázia iha loron 11 dezembru ne’e no sei hasoru malu ho Primeiru-Ministru Malázia iha segunda-Feira semana oin, ho membru Governu balun no ikus liu sei hasoru malu ho liurai boot Malázia, Abdullah Pahang.
Ho oras 24 nia laran iha Malázia, Xefe estadu ho delegasaun sei fila mai Timor-Leste ho tránzita iha Bali (Indonézia) hafoin kuarta-feira sei to’o iha Dili.
Asuntu ASEAN, Horta esplika pozisaun Malázia nian katak dezde tinan 2002, Malázia apoia ona Timor-Leste atu tama ASEAN no sei hadia-an neineik hodi prenxe rekezitu sira.
‘’Malázia dézde uluk apoia Timor-Leste, hahú ita-nia independénsia, sira hateten kedas 2002 bele tama ona ASEAN, depois hadia-an neineik nia governasaun. Ha’u mos hateten ba Primeiru-Ministru Anwar, ami (Timor Leste) hakarak tama ona ba ASEAN iha 2023, la signifika Timor-Leste preparadu 100%, ita nunka sai perfeitu, ita sei halo esforsu makaas husi janeiru to’o novembru 2023. Espera sei tama maibé preparasaun sira seluk kontinua nafatin, ASEAN la’ós lalehan nune’e perfeitu mak tama, Timor-Leste sei tama durante Indonézia nia Prezidénsia iha ASEAN,” Xefe Estadu hateten
Antes ne’e, Xefe Estadu molok sai hosi Dili mai Singapura, seidauk iha planu atu kontinua vizita Estadu ba Malázia ho razaun oras ne’e Primeiru-Ministru Malázia foin simu nia pose no formasaun Governu seidauk kompletu, nune’e vizita ne’e hanesan vizita traballu no fulan balun oin mai sei organiza vizita Estadu nian bainhira governsaun kompletu ona.
Jornalista : Nelson de Sousa
Editór : Cancio Ximenes
