VIQUEQUE, 13 dezembru 2022 (TATOLI)— Koordenadór Konstrusaun Jornada Rezistésia Edimumu, atuál Xefi Suku Afaloikai, Postu Uatulari, munisípiu Viqueque, Constantino Guterres, informa oras ne’e dadaun sítiu istóriku Jornada Rezisténsia antigu Falintil Karauk Fuik Edimumu, iha Postu Administrativu Uatulari ninia konstruksaun hahú ona.
“Kona-ba konstrusaun sítiu istóriku Jornada Rezisténsia sai fatin Turismu Edimumu. Ha’u maka sai koordenadór agora dadaun tekniku sira mai sukat hodi halo konstrusaun no ami simu ona osan hosi Ministériu Komersiu Indústri no Turismu (MTKI) ba fase dahuluk 40%”, Koordenadór ne’e hateten ba Agência TATOLI, iha suku Afaloikai, tersa ne’e.
Nia hatutan, MTKI halo ona pagamentu ba fase dahuluk nian ho 40% totál osan hamutuk $16.500. Osan ne’e simu uluk ona hodi halo konstrusaun ba fase dahuluk.
“Prosesu serbisu ba fase dahuluk nian remata ona no ami halo relatóriu ba ministériu relevante maka foin halo tan pagamenti ba fase daruak nian”, nia haktuir.
Nia dehan, ba konstrusaun ne’e halo kontratu ba badaen sira no komunidade hosi suku neen (6) ne’ebé apoia serbisu ho voluntariu tanba sitiu turistiku ne’e la’os ema ida nian, maibé ba postu Uatulari nian hotu.
Nia dehan, Konstrusaun sitiu ne’e sei la durante fulan tolu, maibé depende ba klima.
Jornalista : Vitorino Lopes da Costa
Editora : Armandina Moniz
