Uma Mahon Maria Tapo fó asistensia vítima violasaun feto no labarik 38
BOBONARO, 14 dezembru 2022 (TATOLI)-Koordenadora Interina Forum Komunikasaun Feto Timor Lorosa’e (FOKUPERS, sigla dalen maláiu), Domingas Casemira, fó-sai katak, hahú hosi janeiru to’o dezembru 2022 fó asistensia ba vítima kazu violasaun hasoru feto no labarik hamutuk na’in-38.
Vítima hirak-ne’e mai hosi postu administrativu neen iha munisípiu Bobonaro.
Domingas haktuir, vítima hirak-ne’e refere hosi organizasaun Naun Governamentál Rekuperasaun Psikososiál no Dezenvolvimentu iha Timor-Leste (PRADET, sigla inglés) no Polísia Vulneravel Person unit (VPU) komandu munisípiu Bobonaro ho tipu kazu violénsia doméstika, insestu, abuzu seksuál, kazu abandona hosi la’en kaben no família.
Notísia relevante: ALFELA Rejista Kazu Violasaun 452 Hasoru Feto ho Labarik
“Ami uma mahon fó atendimentu ami simu hosi referál no iha balu mós sira mai mesak, entaun ninia prosesu ne’e ami halo jestaun kazu depois ami refere ba vítima ninia nesesidade, karik sira mai mesak ami sempre refere ba Polísia VPU no Ministériu Públiku, dalaruma kazu abandona sira mak mesak mak ami refere ba rede referál ne’ebé maka iha,” nia informa ba jornalista sira, iha kna’ar fatin, Maliana, kuarta ne’e.
Kauza hosi kazu ne’e mak hanesan parte violasaun doméstika nian, hare liu ba aspetu ekonomia, tanba rendimentu família menus atu asesu ba merkadu, dezempregu no kulturál.
Parte abandona, tanba ransu livre, sosiál mídia no labele kontrola emosaun, hosi parte violénsia públika tanba fatór ekonomia, kulturál no dezempregu.
Nia dehan, hosi totál vítima hirak-ne’e, na’in-rua mak sei iha hela prosesu nia laran, restante reintegra ona ba família hamutuk na’in-48 inklui ho kazu tuan sira.
“Ami akompaña kazu sira durante ne’e hasoru difikuldade mak dalaruma ba halo julgamentu suspeitu la marka prezensa, entaun julgamentu tenke adia beibeik, depois ita lori fila. Iha parte ida mos vítima kuandu ami halo re-integrasaun iha balu mak kuandu sira di’ak malu ona lakohi koopera ho ami atu ba tuir prosesu sira tuir mai,” Koordenadór interina ne’e dehan.
Enkuantu haree ba númeru kazu violénsia kontinua rejista kada tinan maka Uma Mahon Maria-Tapo serbisu hamutuk Ho Sekretaria Igauldade no Inkluzaun (SEII) halo sensiblizasaun kona-ba lei kontra violénsia, saúde reprodutiva nune’e bele minimiza kazu hirak-ne’e.
Nune’e mós Ministériu Solidariedade Sosiál no Inkluzaun (MSSI) fasilita halo sensiblizasaun kona-bá violénsia bazea ba jéneru (VBJ).
Maibé nia deha, esforsu hirak-ne’e mós seidauk bele halo redusaun ba kazu sira, tanba uma mahon depende liu ba orsamentu hosi doadór sira, nune’e labele halo akonsellamentu kobre munisípiu laran tomak.
“Hau sente governu presiza aumenta orsamentu ba iha programa ida-ne’e atu nune’e habelar tán informasaun. MSSI serbisu hamutuk ho Word Bision halo programa ne’e iha Maliana maibé ba de’it sira-nia área intervensaun de’it, Word Vision durante ne’e iha de’it postu Balibó,” nia katak.
Notísia relevante: Demografia saúde: 33 % feto sofre violénsia doméstika
Jornalista: Sérgio da Cruz
Editór: Evaristo Soares Martins
