Prezidente Repúblika promulga lei OJE 2023
DILI, 15 dezembru 2023 (TATOLI)—Prezidente Repúblika (PR), José Ramos Horta, promulga ona lei Orsamentu Jerál Estadu (OJE) 2023 hosi montante inisiál biliaun $3,16 ba iha biliaun $2-resin.
Notísia Relevante: PR Horta husu TR halo fiskalizasaun preventiva ba fundu veteranu
“Ha’u promulga tiha ona tanba fundu veteranu monu tiha ona, ha’u konsulta ho Prezidente Tribunál Rekursu. Hatun tiha biliaun $1 sai biliaun $2,10,0, nune’e maizamenus,” Xefe Estadu informa ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Antes ne’e, iha 17 novembru 2022, Parlamentu Nasionál (PN) liuhosi reuniaun plenária, aprova proposta-lei númeru 46/V(5a) Orsamentu Jerál Estadu (OJE) 2023 ho montante biliaun $3,16 iha finál globál ho votu a-favór 42, kontra 21 no abstensaun rua (2).
Parlamentu Nasionál (PN) aprova Proposta OJE 2023 ho montante biliaun $3,16 kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál, biliaun $1), orsamentu seguransa sosiál hetan alokasaun millaun $235,7 no RAEOA millaun $120.
Maibé, liuhosi pedidu Prezidente Repúblika, José Ramos Horta nian ba Tribunál Rekursu hodi halo fiskalizasaun preventiva ba fundu veteranu no ikus mai desizaun Tribunál fó sai katak fundu veteranu inkonstituisionalidade.
Tanba ne’e, Prezidente Repúblika promulga de’it mak proposta OJE 2023 eseptu fundu veteranu biliaun $1, nune’e fundu ne’e laiha efeitu ka elimina.
“Fundu veteranu ketak entaun labele lakon tempu ka demora hodi Governu iha tempu prepara ezekusaun orsamentu hahú janeiru, ohin kedas promulga tiha ona no hahú ohin ka aban sei públika iha jornal repúblika,” PR Horta hateten.
Xefe Estadu hato’o mensajen katak la’ós kontra ideia Governu nian kona-ba fundu veteranu ne’e, tanba hansan Governu esplika ba nia-parte fundu ne’e la’ós fó ba veteranu sira maibé atu halo investimentu depois nia bele hetan funan.
“Maibé ha’u hateten di’akliu prepara didi’ak lai halo konsulta iha Parlamentu ho sosiedade sivíl no depois mekanizmu sé mak atu halo supervizaun ne’e la’ós fasil. Entaun di’akliu tinan oin eleisaun daudaun ona halo tan ida-ne’e, di’akliu lalika. Aleinde Tribunál hateten inkonstituisionalidade maibé ba oin ita haree saida mak bele halo oin seluk karik,” nia hateten.
Notísia Relevante: PN aprova proposta-lei OJE 2023 biliaun $3,16 iha finál globál
Jornalista : Nelson de Sousa
Editór : Cancio Ximenes
