CNE-STAE atualiza preparativu eleisaun parlamentár 2023 ba PR Horta

DILI, 16 dezembru 2022 (TATOLI)—Komisaun Nasionál Eleisaun (CNE, siglá portugés) ho Sekretariadu Tékniku Administrasaun Eleitorál (STAE), sesta ne’e, atualiza preparativu ba realizasaun eleisaun parlamentár 2023 ba Prezidente Repúblika (PR), José Ramos Horta.

Notísia Relevante:  Eleisaun parlamentár 2023, CNE preparadu no hein PR anúnsia kalendáriu

“Ohin, órgaun eleitorál mai hasoru Prezidente Repúblika, CNE ho STAE husu kona-ba preparasaun eleisaun 2023 nian hosi CNE ne’ebé ami mai hato’o liu-liu preprasaun agora daudaun hala’o hela hanesan edukasaun sívika. Halo evaluasaun nasionál CNE nian agora halo no haree ba eleisaun sira liu ba, saida mak ita presiza tenke hadi’a no ida-ne’ebé di’ak ona ita tenke halo di’ak liutan,” Prezidente CNE, José Agostinho Costa Belo, hateten ba jornalista sira hafoin ramata enkontru ho Xefe Estadu, iha Palásiu Prezidensiál Nicolau LObato, Bairru Pite.

Nia hatutan, supervizaun tomak serbisu ne’ebé STAE hala’o liu-liu oinsá halo rekrutamentu ita-nia ofisiál hodi garante eleisaun ne’ebé di’ak ho servisu sira seluk, reuniaun ho partidu sira oinsá kria pás no estabilidade ne’e tenke iha nafatin.

“Tanba ne’e, Prezidente Repúblika hakarak hatene preprasaun ami-nian másimu ona bainhira mak Prezidente tuir konstituisaun nia kompeténsia atu bele fó sai marka loron ba eleisaun ba órgaun eleitorál liu-liu CNE preparadu atu hala’o eleisaun,” nia hateten.

Notísia Relevante: Eleisaun parlamentár, STAE sei aumenta sentru votasaun 1.500 iha territóriu nasionál

Kona-ba preparasaun resensiamentu eleitorál hosi Sekretariadu Tékniku Administrasaun Eleitorál (STAE) hala’o hela no sei kontinua iha tinan oin.

“Ba resensiamentu eleitorál tanba lei obrigatóriu antes eleisaun tenke iha resensiamentu, tanba ne’e STAE nia servisu durante ne’e la’o hela no foin mak taka iha 30 novembru liu ba, ami superviziona nafatin haree prosesu tomak,” nia dehan.

Tuir nia, ba iha fulan-janeiru 2023 sei kontinua oinsá eleitór sira-ne’ebé troka sira-nia hela fatin no mós estudante no joven sira iha estranjeiru katak sira iha ne’eba ona presiza reajusta dadus, nune’e labele lakon sira-nia direitu.

Hanesan mós sidadaun sira-ne’ebé atinje ona idade 17 iha posibilidade atu halo reajustamentu mós dadus hodi partisipa eleisaun parlamentár iha 2023.

Diretór Jerál Sekretariadu Tékniku Administrasaun Eleitorál (STAE) Interinu, Leonardo Amaral, hateten enkontru ho Xefe Estadu ne’e ba dá-la tolu ona.

“Ida ne’e, Prezidente Repúblika bolu ba dala tolu, ikus iha 18 novembru no ohin mak Prezidente husu buat rua hanesan planu operasionál ba eleisaun parlamentár 2023 ho preparasaun tékniku,” nia dehan.

Tuir nia, STAE rasik preparadu maibé tenke iha koordenasaun ho órgaun eleitorál sira no diskusaun saida mak durante ko’alia iha sorumutu ho Xefe Estadu ne’e tau on aba nota ka konsiderasaun.

Notísia Relevante: OJE 2023: STAE prevee millaun $10 no $9 realiza eleisaun parlamentár-xefe suku

Jornalista : Nelson de Sousa

Editór       : Cancio Ximenes