iklan

NASIONÁL

Eleisaun parlamentár, STAE sei aumenta sentru votasaun 1.500 iha territóriu nasionál

Eleisaun parlamentár, STAE sei aumenta sentru votasaun 1.500 iha territóriu nasionál

Diretór Jerál STAE, Acilino Manuel Branco. Imajen TATOLI/Egas Cristóvão

DILI, 02 setembru 2022 (TATOLI)–Diretór Jerál Sekretariadu tékniku Administrasaun eleitorál (STAE), Acilino Manuel Branco, hateten iha eleisaun parlamentár 2023 ne’e STAE planu sei aumenta sentru votasaun 1.500 iha teritórriu nasionál.

Asuntu ida-ne’e, nia hateten relasiona ho ema ho defisiénsia mo inklui komunidade nia preokusaun ba sentru vostasaun ne’ebé dook hosi sira-nia hela fatin.

“Entaun ho hirak-ne’e ita hanoin mós aumentu provizóriu ba sentru votasaun no estasaun nian ne’ebé mak ita planu estasaun aumenta ba 1.880 no sentru votasaun nian mak 1.500,” Acilino Branco hateten ba Agência Tatoli, iha nia kna’ar fatin Caicoli, Dili, sesta ne’e.

Ida-ne’e sei provizóriu hela tanba resensiamentu no atualiza baze dadus seidauk ramata no tuir planu katak sei termina iha novembru, hafoin STAE halo sinkroniza no fó sai estasaun no votasaun iha teritórriu tomak.

“Bainhira sinkroniza hotu mak sei kontinua fali iha inisiu tinan oin. Ida-ne’e ita bele dehan aumentu ne’ebé barak tebes no kompara ho eleisaun prezidensiál nian tanba ita rona parte hotu-hotu hanesan maluk sira hosi defisiénsia defisil asesu ba sentru votasaun ne’ebé mak dook no númeru eleitór mós aumenta rekomendasaun hosi parte hotu-hotu,” nia dehan.

Nia dehan ho aumentu sentru votasaun ne’e hodi garante partisipasaun eleitór sira-nian iha eleisaun sira.

Preparasaun ida-ne’e mak durante ne’e STAE ho nia ekipa halo iha terrenu no aleinde ne’e STAE nia ekipa mós arpoxima tan fatin atendimentu ba povu iha área rurál sira, hodi nune’e kontinua halo resensiamentu no atualiza baze dadus.

“Tuir ita-nia planu traballu desde horisehik ne’e ita atu reforsa tan atendimentu to’o iha nível postu administrativu sira. Tanba ita hotu akompaña liu-liu hosi diretór munisípiu sira-nia relatóriu katak iha preokupasaun barak hosi komunidade katak defisil atu asesu iha munisípiu,” nia dehan.

Entaun ho razaun ne’e mak STAE iha abrigasaun atu garente ema hotu-hotu no fasil atu asesu no halo kartaun foun no atualiza dadus.

Ho ida-ne’e, STAE halo ona preparasaun iha semana kotuk ikus ne’e no kompletu ho materiál sira hodi lori ba postu sira hodi atende ba komunidade.

“Tarde liu ohin ho aban sei to’o iha munisípiu sira no iha segunda semana oin hodi hahú halo atendimentu iha postu administrativu sira no sub-rejionál iha Oé-Cusse,” nia hateten.

Aleinde halo preparasaun, STAE husu autoridade lokál atu kontribui maka’as ba iha dadus eleitór óbitu sira ka ema-ne’ebé mak mate ona, nune’e bainhira sinkroniza karik dadus tenke loos ona katak hira mak mate.

Nia dehan ida-ne’e durante ne’e la’o hela maibé ladun efetivu no másimu, entaun STAE buka took mekanizmu ida ho lideransa komunitária ho Ministériu Administrasaun Estatál (MAE), tanba ne’e presiza parte relevante sira-ne’e tuur hamutuk hodi haree mekanizmu ho adekuadu ne’ebé efetivu liu hodi lori rekolla dadus.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!