MJ entrega ekipamentu eletrónika no informatíka ba prizaun Suai
COVALIMA, 16 dezembru 2022 (TATOLI)–Ministru Justisa (MJ), Tiago Amaral Sarmento, sesta ne’e, entrega ekipamentu dormitóriu, eletrisidade, eletrónika no informatika ba prizaun Suai.
Notísia Relevante: Bee tama prizaun Covalima: dadur 188 evakua ba aeroportu Kay Rala Xanana Gusmão
“Ohin, mai entrega ekipamentu dormitóriu, eletrisidade, eletrónika no informatíka ne’ebé finansia hosi fundu emerjensia ba prezu iha prizaun Suai,” Ministru Justisa, Tiago Amaral Sarmento, hateten ba Agência Tatoli iha prizaun Suai.
Governu entrega ekipamentu ne’e bainhira iha fulan hirak-liu ba mosu inundasaun iha prizaun Suai hodi hamosu estragu barak hanesan ekipamentu eletrisidade, kulxaun no komputadór, mak Ministériu Justisa husu pedidu ba fundu emerjénsia atu hato’o karta ba Primeiru-Ministru, Taur Matan Ruak, hodi hatun despaisu ba Ministériu Finansa.
“Ami hato’o agradese tebes, pedidu ne’ebé mak MJ hato’o tanba ikus mai prova ho orsamentu $18,500, ne’ebé konsege sosa ona sasán no ohin entrega ekipamentu dormitóriu, eletrisidade, eletróniku no informatíka sira ba prizaun Suai,” nia hateten.
Diretór interinu prizaun Suai, Januario Barros, hato’o agradesimentu ba Ministru Justisa nia esforsu mak ohin loorn bele entrega ekipamentu hirak ne’e ba prizaun Suai.
“Ha’u hato’o ha’u-nia agradesimentu tomak ba Ministériu Justisa ho nia esforsu tomak ohin loron mai iha Suai hodi entrega ekipamentu sira-ne’e,” nia dehan.
Ekipamentu dormitóriu ne’ebé Ministériu Justisa entrega ne’e mak hanesan esponza unidade 120, sumasu unidade 120, froñas kulxaun nian iha unidade 120, manta unidade 120, froñas sumasu nian iha unidade 120.
Ekipamentu eletrisidade mak hanesan lampu neon unidade 20, ampolas lampu sorot unidade 10, lampu Philips unidade 54, fiu ka kabel eletrisidade rolu ida ho metro 100, tomada chock unidade 10, fiu rolu unidade ualu (8).
Ekipamentu eletrónika no informatíka mak hanesan konzeladór boot unidade ida (1), konseladór kiik unidade ida (1), kuluna boot unidade ida (1), Amply Power unidade ida (1), Toa unidade ida (1), televizaun unidade ida (1), receiver unidade ida (1) no desktop unidade haat (4).
Notísia Relevante: Governu apoiu nesesidade bázika ba dadur 118 iha prizaun Covalima
Jornalista : Celestina Teles
Editór : Cancio Ximenes
