DILI, 16 dezembru 2022 (TATOLI)—Sekretáriu Estadu Asuntu Konbatente Libertasaun Nasionál (SEAKLN), Júlio da Conceição ‘Loro Mesak’, hateten atu finaliza verifikasaun dadus veteranu ne’ebé rejistu iha 2009, SEAKLN sei hein Orsamentu Jerál Estadu (OJE) 2023 nian.
“Verifikasaun dadus veteranu rejistadu, tuir kalendáriu ramata iha 06 dezembru, maibé verifikasaun ida-ne’e seidauk finaliza. Ita sei hein fali OJE 2023 nian mak foin bele kontinua hodi finaliza lalais”, Júlio da Conceição ‘Loro Mesak’ hateten ba Agência Tatoli, iha nia kna’ar fatin, Caicoli, sesta ne’e.
Notísia Relevante: Verifikasaun dadus veteranu rejistadu 2009 atinje ona 90%
Nia haktuir, munisípiu hotu-hotu la signifika verifika hotu ona, tanba munisípiu balun ne’ebé komisaun to’o tiha sira-nia fatin, sira laiha fatin no kestaun ida mak pandemia COVID-19.
Iha kada munisípiu hela de’it mak 1.000 no besik 3.000 de’it mak seidauk verifika, maibé SEAKLN sei presiza tan osan hodi kontinua halo validasaun depois taka sai naran iha kada munisípiu sira.
Notísia Relevante: Lista veteranu falsu na’in-500-resin ba ona Ministériu Públiku
“Entaun, ida-ne’e hatudu katak ita sei hein orsamentu foun mak bele konklui no taka sai naran iha munisípiu sira,” nia hateten.
Husu kona-ba orsamentu hira mak bele konklui verifikasaun ne’e, nia hatán, sei hein relatóriu hosi komisaun nasionál.
Nia informa, veteranu iha territóriu nasionál ne’ebé mak rejistu iha tinan 2009 ne’ebé sei halo verifikasaun ne’e hamutuk 124.680.
Liuhosi konteúdu ne’ebé mensiona iha Estatutu Kombatente Libertasaun Nasionál, Lei númeru 3/2006 no artigu 13 hateten registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.
Notísia Relevante: MACLN identifika tan dokumentu veteranu falsu 3000-resin
Jornalista : Osoria Marques
Editór : Cancio Ximenes
