iklan

HEADLINE, POLÍTIKA

Governu aprova Planu Estratéjiku Timor Dijitál 2032

Governu aprova Planu Estratéjiku Timor Dijitál 2032

Ilustrasaun Servisu interkoneksaun. Imajen/Espesiál

DILI, 21 dezembru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu, ne’ebé aprezenta hosi Gabinete Primeiru-Ministru no Ajénsia Teknolojia Informasaun no Komunikasaun Timor, Institutu Públiku (TIC Timor, I.P, sigla portugés), kona-ba Planu Estratéjiku Nasionál ba Dezenvolvimentu Dijitál no Teknolojia Informasaun no Komunikasaun (Timor Dijitál 2032).

“Planu Estratéjiku Timor Dijitál 2032 sei implementa hosi TIC Timor, I.P, liuhosi koordenasaun Prezidénsia Konsellu Ministru, ne’ebé hanesan parte integrante hosi programa reforma administrasaun públika VIII Governu Konstitusionál Timor-Leste nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: TIC Timor, I.P iha planu prioridade tolu ba tinan 2023

Inisiativa ne’e nu’udár planu estratéjiku ba tinan-10 atu dezenvolve teknolojia dijitál sira hodi énfaze ba ninia aplikasaun iha área krítika ho impaktu boot iha dezenvolvimentu umanu no ekonómiku, hanesan prestasaun servisu governmanetál sira, Governu eletróniku ka dijitál, ekonomia inkluziva, saúde, edukasaun no agrikultura.

Nune’e, hodi mantein aliñadu ho prioridade dezenvolvimentu Governu nian, planu estratéjiku ne’e prepara mós ba adaptabilidade no posibilidade atu inklui neneik-neneik área adisionál.

TIC Timor hanesan Instituisaun Públika ne’ebé harii liuhosi dekretu-lei númeru 29/2017 iha 02 agostu 2017 no tutela ba Primeiru-Ministru.

Ajénsia ne’e harii ho baze atu dezenvolve di’ak liután setór informasaun, komunikasaun no teknolojia hodi hafasil servisu ho kualidade di’ak ba instituisaun Governu sira hotu, ajénsia no empreza Estadu sira hotu hodi eleva koñesimentu inklui promove dezenvolvimentu sosiu-ekonómiku, diversifikasaun ekonomia, bem-estar no mós kualidade moris sidadaun sira.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!