DILI, 22 dezembru 2022 (TATOLI)–Governu liuhosi Ministériu Finansa (MF) hahú hosi tinan 2018 to’o dezembru 2022 halo ona levantamentu osan hosi petrolíferu ho montante biliaun $5,4.
“Durante tinan-lima ikus ne’e, VIII Governu Konstitusionál halo ona levantamentu osan hosi fundu petrolíferu hamutuk biliaun $5,4 hosi totál montante aprovadu hosi Parlamentu Nasionál hamutuk biliaun $7,1. Ida-ne’e hatudu katak iha poupansa ka diferensa entre levantamentu aprovadu hosi Parlamentu Nasionál no levantamentu atuál kuaze biliaun $1,7,” Ministru Finansa, Rui Gomes, informa liuhosi nota ne’ebé Agência Tatoli asesu, kinta ne’e.
Notísia relevante: BCTL sujere Governu uza fundu petrolíferu ho kuidadu
Ministru relata kestaun ne’e bainhira halo abertura iha reuniaun Konsellu Konsultivu Ministériu Finansa (CCMF, sigla inglés) alargada tinan 2022, iha auditóriu Kay Rala Xanana Gusmão, Ministériu Finansa, Aitarak-laran.
MF hahú hosi fulan-janeiru to’o inísiu dezembru 2022, halo ona levantamentu osan hosi fundu petrolíferu ho montante biliaun $1,4 ka 55%, hosi totál biliaun $2,55 ne’ebé mak Parlamentu Nasionál aprova ona liuhosi lei Orsamentu Jerál Estadu (OJE) retifikativu 2022.
“Maski foin mak to’o iha loron 22 dezembru 2022, maibé ezekusaun reál OJE retifikativu 2022 ba administrasaun sentrál ein termu valór ezekuta ona biliaun $1,56 hosi totál orsamentu retifikativu biliaun $3,2. Taxa ezekusaun ne’e mak segundu maiór desde tinan 2016 ne’ebé Governu konsege ezekuta biliaun $1,63.
CCMF alargada ne’e partisipa hosi Vise Ministru Finansa, António Freitas, Komisáriu Autoridade Aduaneira, reprezentante Komisáriu Autoridade Tributária, Diretór Jerál sira, Inspetór Jerál, Koordenadór Gabinete Diretór Nasionál, Xefe Departamentu no funsionáriu MF hosi nasionál no munisípiu sira.
Jornalista : Arminda Fonseca
Editora : Julia Chatarina
