BOBONARO, 27 Dezembru 2022 (TATOLI) – Sentru Solidariedade Sosiál no Inkluzaun, Munisípiu Bobonaro, lideradu hosi Fransisco Tilman, deside devolve hikas orsamentu $298,400 ba kofre estadu tamba la konsege ezekuta iha pagamentu subsídiu uma-kain fim do Ano $200 iha 2022.
Koordenadór Jerál pagamentu subsídiu fim do ano $200, Munisípiu Bobonaro, Fransisco Tilman, informa tuir kalendáriu katak prosesu pagamentu hala´o iha 12-15 novembru no konklui ona iha semana kotuk.
Notísia Relevante:Suku Lontas devolve $11,400 ba BNCTL hosi subsídiu $200
“Ita Munisípiu Bobonaro totál benifísiáriu 29,972 ho osan ne’ebé ita paga ne’e hamutuk $5,695.800 no osan ne’ebé ita sei devolve fali ba kofre estadu hamutuk $298,400 hosi totál ema ne’ebé la foti osan hamutuk na’in 1.493”, Nia imforma ba jornalista Tatoli iha nia kna’ar fatin Bairu Mugis, Suku Raifun, tersa ne’e.
Fransisco Tilman, haktuir benefisiáriu sira ne’ebé la konsege simu subsídiu ne’e maioria membru Polísia Nasionál Timor-Leste (PNTL), Falintíl Forsa Defeza Timor-Leste (F-FDTL), funsionáriu sira ne’ebé asume kargu ho saláriiu liu $500, inklui mós komunidade sira ho razaun oin-tolu.
“Ita nia komunidade ne’ebé la foti, primeiru tanba nia foti tia iha fatin seluk, segundu nia naran dobru, kartaun eleitorál ho naran la han malu, ida fali mak komunidade sira la konsege to’o iha fatin pagamentu, sira dehan $200 ne’e husik ba tamba ne’e mak sira lakohi mai foti de´it”, friza.
Diretór hateten durante prosesu pagamentu, tékniku sira identifika problema rua, primeiru iha Postu Administrativu Atabae pagamentu la tuir oras, tamba iha loron 13 momentu halo levantamentu osan hahú iha tuku 03:00, autoridade lokál sira la halo kedas pagamentu ba benefisiáriu sira ho razaun kolen, maibe ikus mai konsege konklui.
Aleinde ne’e, mosu mós problema iha Suku Carabau, Postu Adminiatravu Bobonaro, komunidade sira lori sasán kroat ameasa ekipa tékniku sira tamba naran la iha lista pagamentu.
“Ha´u tun kedas iha terrnu,konsege hakalma depois ha´u esplika ba sira komprende hotu sira retira tia,ikus prosesu pagamentu lao nafatin ho di´ak to’o remata”, hateten.
Koordenador ne’e haklaken dadaun ne’e sentru Solidariedade Sosiál no Inkluzaun, Munisípiu Bobonaro, rejista dadus reklamante provizóriu ho xefe família na’in 290-resin.
Maibe nia dehan sei halo komfirmasaun ho Ministériu Administrasaun Estatál (MAE) atu hare fila fali, dadus ne’ebé aprezenta hosi suku ne’e, los ka la´e, tamba ekipa tékniku sira identifika iha terrenu dadus barak mak doubru,hanesan suku balu naran iha lista rua,maibé benefisiáriu na’in ida de’it.
Tamba ne’e responsavél programa subsídiu fim do ano iha Munisípiu Bobonaro, haklaken MSSI la prodúz dadus, nune’e reklamante atu hetan sira nia direitu iha tempu tuir mai, sei entrega ba nivél leten atu sira foti desizaun selu ou la´e.
“Ami nia haree iha suku balun, ema naran Martinho Soares, Martinho Soares hotu ‘Padahal’ ema na’in ida de’it, tamba ne’e ami husu ba autoridade lokál sira tenke alista komunidade sira nia-naran tuir ema ne’ebé sei hela metin iha ne’ebá, labele ita dehan ema ida ne’e uluk ha’u nia ema, afinál ema ne’e mós fixa família iha postu no munisipiu sira seluk”, dehan.
Enkuantu, ekipa tékniku pagamentu subsídiu $200 Munisípiu Bobonaro, dadaun ne’e prepara ona transporte atu lori dokumentu fiziku sira ba MSSI.
Notísia Relevante:Governu lansa pagamentu subsídiu $200 ba benefisiáriu 1,551 iha Holsa
Jornalista: Sérgio da Cruz
Editór: Zezito Silva
