BOBONARO, 29 dezembru 2022 (TATOLI) – Banku Nasionál Komérsiu Timor-Leste (BNCTL), kinta ne’e, hatúr fatuk dahuluk hodi hahú konstrui ba edifísiu foun sukursál Maliana, Munisípiu Bobonaro ne´ebé lokaliza iha aldeia Raimaten, Suku Odomau ho kustu $998,383 ne’ebé responsabliza hosi empreza lokál Kevkel Brother ho Ely Karya no Rai-Mean Unsipesoál Lda.
Diretór ezekutivu Interinu BNCTL Nasionál, Alcino Monteiro, hateten banku estatál ne’e komprensivu ona iha nia planu estratéjiku sira katak gradualmente sei iha infrastrutura sira iha sukursaál hotuhotu inklui Maliana ne’ebé obra ne’e loloos implementa iha tinan hirak liubá.
Maibé tamba situasaun covid-19 no impase polítika ne’ebé la´o iha rai-laran impede prosesu sira ne’e hotu to’o atu finaliza 2022 mak foin implementa.
Notisia Relevante:BNCTL promove diálogu hodi rona kliente Bobonaro nia preokupasaun
Enkuantu, konstrusaun edifísiu foun hetan kedas bensaun hosi Padre Pároku Santa Cruz Maliana,Valerio Gusmao, no sei fó asesu no halo atendimentu servisu bankaria nia iha ambiente foun, ho espasu atendimentu ne’ebé diak, luan, nune’e kliente sira bele sente konfortável no kontente bainhira mai vizita sukursá Maliana.
“Ha´u atu esklarese de´it katak inisiativa atu hahú konstrui ida ne’e tamba ita haree sukursál Maliana ne’e estrablese hahú kedas iha fulan dezembru 2002 ho nia kondisaun edifísiu ida ne’ebé ita-boot sira rasik haree no sente atu atende ema populasaun 100-resin iha Maliana, ha´u hanoin ida ne’e la suficiente tamba ne’e BNCTL hakarak tinan ida ne’e ita hahú konstrusaun”, revela.
Nia hatutan ho establesimentu esdifísiu foun ne’e atvidade ekonómika iha munisípiu Bobonaro sei la´o di´ak liután iha lina fronteira hodi konstrubui ba prosesu dezembolvimentu Nasionál inklui adezaun Timor-Leste ba ASEAN.
“Ha´u hanoin ita hotuhotu tenke tau matan ba BNCTL tamba ne’e la´os ami na’in hira ne’ebé servisu iha laran nia de´it maibé BNCTL ne’e ita hotu nia atu servi ba autoridade munisípiu sira, seguransa, xefe suku no komunidade sira hotu”, Alcino Monteiro katak
Reprezentante Prezidente Autoridade Munisípiu Bobonaro, Julio Carvalho Caerro, sente kontente no agradese ba BNCTL tamba konsidera obra ne’e hanesan prezente Natál no tinan foun hodi responde preokupasaun komunidade Munisípiu Bobonaro iha setór ekonomia no agrikultura.
Tamba edifísiu tuan ne’ebé harii iha tinan hirak liubá, hahú ho naran mikro finansa ne´ebé ladún iha espasu sufisiente atu akumula kliente barak, ho nune’e, eis-sekretáriu autoridade munisípiu Bobonaro husu ba empreza lokál ne’ebé responsabliza obra ne’e atu servisu ho kualidade tuir dezenu no BOQ, nune’e bele finaliza tuir kontratu ne’ebé atribui durante tinan ida.
“Ha´u servisu hanesan sekretariu autoridade Bobonaro durante tinan 10, ne’ebé empreza sira iha kualidade no iha kuantidade ne’e ha´u hatene hotu, nune’e ha´u husu ba empreza tolu atu servisu ho di´ak atu 2023 antes natál ita-boot sira entrega ba komunidade Bobonaro katak prémiu tinan foun mak ne’e no prontu ona”, refere Julio Apela.
Entertantu, BNCTL ho nia sede iha Dili to’o dezembru 2022, konsege mobiliza no depozitu ona osan hamutuk $665,4 milaun no fó ona kréditu $234,5 milaun ho nia ativu $814,4 milaun no atende kliente 350-rihun.
BNCTL iha faze transformasaun nia-laran ho objetivu atu melora atendimentu no presta servisu ba kliente ho dignu, pro ativu hodi dijitaliza atendimentu, diversifika produtu bankária no melora jestaun iha operasaun sira, risku no moderniza infrastrutura banku nia.
Durate ne’e BNCTL establese sukursál iha munisípiu 13 no ajénsia 23, Banku Movél 13, Automatic Macine Teller (ATM) 70,Point Off Salles (POS) 170 iha teritóriu laran tomak, nune’e fazeadamente BNCTL nakfilak-an hanesan ‘Banku Modernu’ no sei hetan konfiansa boot liu hodi kontribui ba kresimentu ekonomia no dezembolvimentu Timor-leste.
Notisia Relevante:Pagamentu subsídiu $200, BNCTL lori fundu to’o de’it iha postu administrativu
Jornalista: Sérgio da Cruz
Editór: Zezito Silva
