VIQUEQUE, 30 dezembru 2022 (TATOLI)—Pagamentu subsídiu Fim do ano $200 ba kada uma-kain $200 iha suku Afaloikai, postu administrativu Uatucarbau, munisípiu Viqueque ramata ona no konsege devolve osan restu $6.600 ba kofre Estadu.
“Hosi suku Afaloikai iha benefisiáriu hamutuk uma-kain 395, maibé konsege halo pagamentu ba uma-kain 362,” Xefe suku Afaloikai, Agustinho Pinto, informa ba Agência Tatoli, via telefónika, sesta ne’e.
Notísia relevante: Governu halo ona pagamentu subsídiu $200 ba uma kain 295.300
Enkuantu, uma-kain 33 maka la simu tanba sira-nia saláriu liu $500, ne’ebé ninia família hanesan profesór, pesoál saúde no membru Polísia Nasionál Timor-Leste (PNTL).
Aleinde ne’e, suku Afaloikai iha lista reklamante 10 ne’ebé sira-nia naran laiha lista pagamentu.
“Reklamante uma-kain 10 ne’e ha’u hatama fali sira-nia lista ba postu Uatucarbau hodi haruka fali ba nasionál,” nia akresenta.
Jornalista : Vitorino Lopes da Costa
Editora : Julia Chatarina
