COVALIMA, 04 janeiru 2023 (TATOLI)—Autoridade Protesaun Sivíl (APC, sigla portugés), distribui materiàl konstrusaun ba vítima dezastre naturál uma kain haat (4) iha postu administrativu Fatululik, munisípiu Covalima.
Notísia Relevante: Autoridade Covalima orienta APC identifika vítima dezastre naturál
“Ami ho ekipa mai halo distribuisaun materiàl konstrusaun ba ita-nia vítima dezastre naturál. Uma kain haat (4) iha postu administrativu Fatululik,” Komandante Autoridade Protesaun Sivíl (APC), Inspetór Xefe Flavio Mendes, hateten ba Agência Tatoli iha resintu sede suku Taroman, kuarta ne’e.
APC hamutuk ho ekipa distribui materiàl konstrusaun ba vítima dezastre naturál ne’e, iha kuarta (28/12/2022) ne’ebé ho tipu dezastre natural anin sobu komunidade nia uma aat totál.
Tanba ne’e, nia dehan, bazea ba kritèria distribui materiàl konstrusaun fahe ba katégoria sira hanesan uma aat totál, aat kmaan no aat natoon maibé vítima iha postu administrativu Fatululik kategóriu uma aat totál.
Bazea ba dadus, vítima uma kain haat (4) ne’ebé afetadu ba dezastre naturál hosi suku Taroman ne’e iha vítima uma kain tolu no suku Fatululik aldeia Aitoun ne’e na’in-ida I1) ho tipu dezastre anin sobu uma ne’ebé akontese iha tinan 2022.
Materiál konatrusaun ne’ebé distribui ba vítima dezastre naturál sira-ne’e mak hanesan zinku (kalen), somente, besi, parafuju no seluk tan.
Alende distribui materiàl konstrusaun, entrega mós osan ba vítima sira-ne’ebé nia uma aat natoon hodi entrega osan $750, uma aat total ne’e entrega osan $1000 no aat kmaan ne’e ho osan $600.
Jornalista : Celestina Teles
Editór : Cancio Ximenes
