DILI, 04 janeiru 2023 (TATOLI)—Eletricidade de Timor-Leste, Empreza Públika (EDTL, E.P) rekolla reseita millaun $48,36 ba kofre Estadu, iha tinan 2022.
“Agradese ba dirijente hotu nia kontribuisaun ba tinan 2022 tanba EDTL, E.P bele ultrapasa progresu rekolla reseita, konsege sa’e millaun $48,36, kompara ho tinan 2021 hetan millaun $34.371,72,” Prezidente Konsellu Administrasaun EDTL, E.P, Paulo da Silva, hateten liuhosi nota ne’ebé Agência Tatoli asesu, kuarta ne’e.
Notísia relevante: EDTL, E.P rekolla reseita millaun $39,6 iha janeiru to’o outubru
Reseita sira maihosi atividade rutina hanesan inspesaun ba kliente dada ahi ilegál no monta kontadór pré-pagu.
“Ha’u husu ba kada dirijente hosi departamentu ida-idak atu jere didi’ak rekursu ne’ebé iha no servisu di’ak no produtivu liután atu kontinua atinje meta tinan ne’e nian, ho esperansa bele rekolla reseita a’as liután to’o millaun $60 iha tinan 2023,” nia enkoraja.
Iha biban hanesan, Komisáriu Ezektuivu Servisu Tékniku EDTL, E.P, Latino Jerónimo, husu ba funsionáriu tomak, ba oin servisu ho ekipa no mantein komunikasaun di’ak entre dirijente ho funsionáriu sira hotu atu nune’e bele atinje meta.
“Agradese ba funsionáriu tomak, tanba iha ona pasiénsia no dedikasaun durante ne’e hodi hamutuk no kontinua garante fornesimentu enerjia eletrisidade ba ita-nia públiku tomak,” nia dehan.
Orsamentu ba EDTL, E.P ba tinan 2022 hamutuk millaun $90.
Jornalista : Arminda Fonseca
Editora : Julia Chatarina
