iklan

EKONOMIA, HEADLINE

EDTL, E.P rekolla reseita millaun $39,6 iha janeiru to’o outubru

EDTL, E.P rekolla reseita millaun $39,6 iha janeiru to’o outubru

Prezidente Konsellu Administrasaun EDTL, E.P, Paulo da Silva. Imajen Tatoli/Egas Cristóvão

DILI, 01 dezembru 2022 (TATOLI)—Prezidente Konsellu Administrasaun Eletricidade de Timor-Leste, (EDTL, E.P), Paulo da Silva, informa, empreza estatál ne’e konsege rekolla reseita millaun $39,6 durante fulan-10, hahú janeiru to’o outubru 2022.

“Antes hanesan Diresaun Jerál, kada fulan hetan reseita millaun $2,6, maibé hafoin transforma sai EDTL, E.P, kada fulan hetan reseita millaun $2,8. Ita-nia projesaun reseita ba tinan ne’e millaun $40, maibé to’o fulan-outubru ita hetan ona millaun $39,6, signifika to’o dezembru ita iha posibilidade bele hetan millaun $47 resin,” Prezidente Konsellu Administrasaun EDTL, E.P, hateten ba Agência Tatoli, liuhosi programa entrevista eskluziva, iha Farol, kinta ne’e.

Reseita maihosi atividade rutina ne’ebé halo hanesan inspesaun ba kliente dada ahi ilegál no monta kontadór.

“Ita rejista kliente hamutuk 290.000 iha sistema, ne’ebé hosi númeru ne’e iha maiór parte instala ona kontadór maibé balun a’at. Ita agora halo substituisaun ba kontadór foun ne’ebé instala ona, hafoin halo akizasaun tinan kotuk, instala ona hamutuk 90.000 iha Timor laran tomak, inklui aumenta tan kliente foun sira rejistadu hosi programa eletrifikasaun iha 30.000,” nia akresenta.

Notísia relevante: EDTL promete populasaun tomak asesu enérjia elétrika iha 2023

Hosi kliente sira, EDTL, E.P kontinua tau-matan ba sira ne’ebé seidauk rejistu no seidauk instala kontadór hodi halo esforsu fó anúnsiu atu koopera, nune’e tékniku bele ba monta.

Parte balun, daudaun ekipa la’o hodi monta nafatin kontadór, tanba empreza estatál ne’e iha regra no lei atu prega multa bainhira kliente la kumpre no halo ligasaun illegal.

“Ita fó sansaun ba kliente sira bainhira dada ahi ilegál bazeia ba dekretu-lei númeru 33/2016 iha artigu 13 kona-ba multa ba ligasaun ilegál, hanesan ba doméstiku hahú hosi $100 to’o $15.000 no komersiál $2.000 to’o $20.000. Ida-ne’e depende ba kapasidade enerjia ne’ebé uza,” nia tenik.

Aleinde ne’e, programa eletrifikasaun ne’ebé implementa iha faze haat, dahuluk ba suku pilotu 22, tuir mai suku 17, suku 23 no ikus suku tolu.

“Ita lansa hotu ona projetu, daudaun iha faze konstrusaun to’o iha fulan kotuk ita konklui ona suku hamutuk 20 ne’ebé asesu ona enerjia elétrika hosi suku 59. Daudaun projetu la’o nafatin iha faze konstrusaun, balun atinje ona to’o 70% no 80%. Ita-nia espetativa to’o dezembru tinan ne’e nia rohan ita bele hasa’e rásiu eletrifikasaun asesu eletrisidade nível suku bele to’o 93%. Hosi númeru ida-ne’e, to’o tinan oin restu 7% ne’e bele kobre iha trimestre dahuluk iha tinan oin,” nia otimista.

Hafoin konklui programa eletrifikasaun iha suku maka sei kontinua iha aldeia ho polítika hanaran ‘eletrifikasaun komunitáriu.’

“Liu-liu aldeia sira ne’ebé ho distánsia metru ida ka rua hosi estrada boot, ida-ne’e hahú iha fulan ne’e to’o janeiru tinan oin ita hahú servisu hamutuk entre EDTL, E.P no komunidade atu aselera prosesu instalasaun dada liña eletrisidade,” Paulo relata.

Jornalista   : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!