COVALIMA, 04 janeiru 2023 (TATOLI)–Xefe Investigasaun Polísia Nasionál Timor-Leste Unidade Ema Vulneravél (PNTL-VPU) Covalima, Primeiru Sarjentu Amelia de Jesus Amarál, relata hahú hosi janeiru to’o dezembru 2022 ne’e PNTL-VPU Covalima rejista kazu 52 no kazu violénsia domestika mak aas liu.
Notísia Relevante: Janeiru-jullu: PNTL-VPU Covalima rejista kazu 23
“Hahú fulan-janeiru to’o dezembru tinan 2022 ne’e, PNTL-VPU rejista kazu hamutuk 52 iha suku 30 no hosi númeru ne’e kazu violénsia doméstika kontinua aas ho númeru 22 iha munisípiu Covalima,” Primeiru Sarjentu Amelia de Jesus Amarál hateten ba jornalista sira iha Bairru Rompe, kuarta ne’e.
PNTL-VPU rejista kazu 52 ho nia tipu sira hanesan kazu violénsia domestika 22, abuzu seksuál ba menór sia (9), aktu seksuál ba adulsente neen (6), maustratu ba konjuge tolu (3), ezebionismu rua (2), violénsia seksuál ba ema la resiste rua (2).
Kazu violénsia seksuál (rua), koasaun seksuál ida (1), tentativa violénsia seksuál ida (1), ameasa ida (1), pornografia ba infantil ida (1), violénsia ba ema ho defisiénsia ida (1) no kazu abandonadu ida (1).
Autór sira-ne’ebé mak komete kazu ne’e, PNTL-VPU halo ona investigasaun no haruka prosesu ba Ministériu Públiku (MP) hodi prosesa kazu ba tribunal distrital Suai hodi halo julgamentu.
Hafoin PNTL-VPU Covalima haruka kazu sira ba Ministériu Públiku, sira-nia parte akompaña to’o iha tribunal maibé sira kolabora ho ONG Asisténsia Legal Ba Feto no Labarik (ALFela), FOKUPERS no Uma Mahon Salele mak akompaña lezada sira to’o iha prosesu julgamentu.
Notísia Relevante: PNTL-VPU Covalima menus rekursu umanu
Jornalista : Celestina Teles
Editór : Cancio Ximenes
