COVALIMA, 06 janeiru 2023 (TATOLI)–Ministériu Edukasaun Juventude no Desportu (MEJD) liuhusi Servisu Munisipal Edukasaun Covalima muda ona sistema implementasaun programa merenda eskolár iha tinan 2023.
Diretór Servisu Edukasaun Covalima, Rui Amarál Suri Seran, hateten servisu munisipál edukasaun Covalima simu ona orientasaun hosi Ministériu Edukasaun Juventude no Desportu (MEJD) sei hahú implementa programa merenda eskolár iha kinta (19/01) tinan 2023).
“Bazea ba orientasaun ne’e, ami tenke aselera prosesu tanba agora iha ona mudansa kada estudante sei $0,42 sentavu. Antes ne’e kada estudante 0,25 sentavu,” Diretór Servisu Edukasaun Covalima, Rui Amarál Suri Seran, hateten ba jornalista sira, iha salaun AMC, Sukaer Laran, sesta ne’e.
Implementasaun programa merenda eskolár iha ona mudansa tanba uluk ne’e xefe gabinete mak foti-osan maibé agora sei forma ekipa jestaun programa merenda eskolár iha koordenadór ida, tezoreiza ida no fokál point na’in-tolu (3 ), sira mak sei jere rasik osan.
Tanba ne’e, servisu edukasaun munisípiu Covalima realiza enkontru ho koordenadór eskola sira iha munisípiu Covalima hodi ko’alia kona-ba implementa programa merenda eskolár.
Antes ne’e, polítika Governu implementa programa merenda eskolár ba estudante sira durante loron 52, maibé ba tinan 2023 ne’e implementasaun programa merenda eskolár durante loron-90. maibé sei hein kalendáriu hosi MEJD.
Bazea dadus tinan 2022 ne’ebé Agênsia Tatoli asesu hosi servisu munisipál edukasaun Covalima implementa programa merenda eskolár iha eskola 37, kompostu hosi Edukasaun Ensinu Báziku Central (EBC) no pre-eskolár Públiku no privada iha munisípiu Covalima.
Jornalista : Celestina Teles
Editór : Cancio Ximenes
