DILI, 06 janeiru 2023 (TATOLI)–Ministériu Edukasaun Juventude no Desportu (MEJD) simu apoiu materiál emerjénsia hosi parseiru dezenvolvimentu, United Nations International Children’s Emergency Fund (UNICEF) atu rekupera hikas kondisaun eskola 15 iha munisípiu hitu ne’ebé udan no anin sobu estraga iha dezembru 2022 to’o janeiru 2023.
Ministru Edukasaun Juventude no Desportu, Armindo Maia, konsidera, kestaun dezastre naturál laiha ema ida maka bele imajina tanba udan iha setembru no outubru, maibé akontese fali iha dezembru ikus hodi estraga infraestrutura barak.
“Eskola balun sei foun no di’ak hela maibé tanba dezastre naturál rai halai halo eskola balun estraga totál, tanba ne’e presiza duni atu hadi’a. Ministériu Edukasaun Juventude no Desportu inklui instituisaun Estadu hotu foin liuhosi prosesu ne’ebé ita-nia orsamentu foin distribui, tanba ne’e daudaun sei mamuk hela. Ita-nia armazen mós sei mamuk,” Ministru hateten iha serimónia distribuisaun materiál emerjénsia, iha salaun MEJD, Vila Verde, sesta ne’e.
Notísia relevante: UNICEF-MEJD distribui ai-oan ba eskola 12 iha Covalima
Nune’e, ho disponibilidade parseiru dezenvolvimentu UNICEF, ho vontade tomak prontu atu tulun MEJD liuhosi materiál emerjénsia hanesan lona tahan 166, kalen tahan 1.500, pregu kalen pakote 100, kalen lizu tahan 100, ai kuadradu 200 unidade no re-use santitary pads 15.000.
“Ministériu sei responde imediata eskola sira ne’ebé afetadu dezastre naturál. Aban ami sei mobiliza hodi halo distribuisaun maibé ita sei fó apoiu materiál emerjénsia sira ne’e depende ba grau gravidade ne’ebé eskola sira iha hodi haree tuir nesesidade,” nia tenik.
Tanba ne’e, nia husu ba dirijente sira hotu iha MEJD atu serbisu hamutuk buka koopera malu, nune’e sasán sira ne’ebé entrega ona bele distribui tuir nesesidade eskola.
Iha fatin hanesan, Reprezentante UNICEF iha Timor-Leste, Bilal Durrani, hateten, materiál emerjénsia hirak ne’e ninia kuantidade la boot tanba iha osan hodi prepara materiál emerjénsia ho kustu $34.056.
“Valór ne’ebé UNICEF oferese ne’e kiik, maibé importante liu maka eskola sira bele rekupera hikas prosesu ensinu aprendizajen. Tinan ne’e ami sei kontinua apoiu Ministériu Edukasaun hodi sosa materiál rezerva ba situasaun emerjénsia atu nune’e bele distribui hodi uza imediatamente bainhira mosu situasaun emerjénsia iha futuru,” nia dehan.
Biban ne’e, Bilal Durrani uza oportunidade hodi informa katak daudaun ne’e UNICEF fó apoiu ba MEJD hodi halo ezbosu opsaun polítiku hodi responde kestaun emerjénsia iha futuru. Dokumentu sira ne’e hotu sei ko’alia kona-ba opsaun risku dezastre. Kolesaun dadus sira hotu kompleta ona no pasu tuir mai mak sei halo sorumutuk validasaun.
“Ami hein katak dokumentu opsaun ba risku dezastre naturál sei ajuda ministériu no parseiru sira hotu atu asegura ita-nia preparasaun resposta no rekuperasaun iha situasaun emerjénsia liuhosi koordenasaun ba rezultadu di’ak liu,” nia salienta.
Aleinde ne’e, nia hato’o apresiasaun ba MEJD ninia kompromisu, ne’ebé ho aten brani atu asegura labarik sira goza direitu ba edukasaun.
“Ho nune’e UNICEF ho kompromisu atu asegura labarik inklui ema ho defisiente sira-nia direitu liuhosi intervensaun UNICEF ho programa no koordenasaun atu labarik sira bele besik liután ho parseiru dezenvolvimentu sira seluk,” Bilal Durrani, reforsa.
Jornalista : Tomé Amado
Editora : Julia Chatarina
