COVALIMA, 09 janeiru 2023 (TATOLI)–Diretór Munisipál Servisu Edukasaun Covalima, Rui Amarál Suri Seran, informa progresu implementa projetu komunitáriu konstrui no reabilita eskola 15 iha Covalima la’o ho di’ak no besik atu finaliza ona.
Notísia Relevante: Progresu projetu komunitáriu eskola Laen Tolu atinje ona 60%
“Implementasaun projetu komunitáriu konstrui no reabilita eskola 15 iha Covalima em jerál besik finaliza ona. Maibé hosi eskola 15 ne’e, ha’u seidauk iha dadus eskola hira mak besik finaliza ona tanba durante ne’e progresu implementasaun la’o ho di’ak. Ita hein tempu, bainhira finaliza 100%, entaun Ministru Edukasaun Juventude no Desportu bele halo inagurasaun,” Rui Amarál Suri Seran hatetetn ba Agência Tatoli iha Santa Rosa, Segunda ne’e.
Razaun progresu implementasaun projetu komunitáriu konstrui no reabilita eskola 15 iha Covalima besik finaliza ona, tanba progresu implementasaun ema jerál eskola sira-ne’e taka ona zinku no hein de’it atu monta janela no ajulezu.
Kona-ba bainhira mak atu inaugura implementasaun projetu komunitáriu konstrui no reabilita eskola iha munisípiu Covalima ida-ne’e, nia hatán, nia parte sei haree mós Ministru Edukasaun Juventude no Desportu (MEJD) nia tempu.
Tuir dadus hosi edukasaun Covalima konstrui no rehabilita eskola 15 ne’ebé halo konstrusaun no reabilitasaun mak hanesan EBF Holbolu, Laen-Tolu, Maucola, Salasa, Usecai, Soidiga, Aitos, Macocon, Has-Ain, Eskola Téniku Vokasionál Akar-Laran, Eskola Sekundáriu Jerál Públiku Suai (ESGP, sigla portugés), EBC Zumalai, Fatumea, Traducama konstrui no rehabilita eskola sala-de-aula kompleta ho eskritóriu, armajen no haris fatin kompleta ho toilet.
Antes ne’e, iha segunda (7 outubru tinan 2021), Vise-Ministru Edukasaun Juventude no Desportu, António Guterres, asina kontratu ho grupu komunitária ne’ebé atu konstrui no reabilita eskola 15 iha munisípiu Covalima.
Orsamentu ba reabilita no konstrusaun eskola 15 iha Covalima ne’e mai hosi orsamentu jerál Estadu (OJE) tinan 2021 ne’ebé prevee iha transferénsia públika hamutuk millaun $1.6, grande projetu orsamentu mai hosi rubrika kapitál dezenvolvimentu ne’ebé konstrui eskola Cafe haat (4).
Notísia Relevante: MEJD sei inaugura eskola lima iha Covalima
Jornalista : Celestina Teles
Editór : Cancio Ximenes
