DILI, 10 janeiru 2023 (TATOLI)—Família estudante hosi postu administrativu Iliomar, munisípiu Lautém, husu ba Ministériu Edukasaun Juventude no Desportu (MEJD) atu rigór haree valór mellór klasifikadu estudante atu asesu ba programa bolsa méritu, nune’e bele konsidera esforsu estudante sira.
Sónia Seixas Miranda, nu’udar bin hosi estudante Anilcia Waruday Magno da Silva, ne’ebé eskola iha Ensinu Sekundáriu Jerál (ESJ) Katólika São João Paulo II Iliomar, sente la satisfaz tanba nia alin rasik hetan valór di’ak ka tama kategoria mellór klasifikasaun atu hetan bolsa méritu, maibé parte eskola rasik hasai nia alin nia naran hodi la hetan, enkuantu bazeia ba matadalan, eskola sira mak soma valór estudante sira atu hetan bolsa méritu.
“Estudante ho klasifikasaun di’ak mak hetan bolsa méritu, maibé momentu profesór sira halo selesaun ba estudante ne’ebé mak hetan valór di’ak, haruka naran ba munisipál ne’e loloos alin nia naran mós tama hotu tanba alin nia valór di’ak no merese atu hetan, maibé alin nia kolega sira ne’ebé hetan valór kiik liu hosi alin mak hetan fali mellór klasifikasaun, ha’u-nia alin rasik la hetan, ida-ne’e ami sente la satisfaz,” Sónia Seixas, haktuir ba Agência Tatoli, via telefónika, tersa ne’e.
Notísia relevante: MEJD prevee millaun $7,2 atu atribui ba estudante mellor klasifikada
Relasiona ho nia alin la hetan bolsa méritu, iha loron 22 dezembru 2022, Sónia Seixas ba halo konfirmasaun iha Eskola ESJ Katólika São João Paulo II Iliomar no hasoru Adjuntu eskola hodi hatudu matadalan bolsa méritu inklui nia alin nia kaderneta eskola.
“Ha’u haree alin nia notas ne’e bele hetan bolsa méritu tanba nia valór iha ezame períodu dahuluk hetan III lugar ho valór 111, ezame períodu daruak hetan II lugar ho valór 111 no ezame períodu datoluk hetan III lugar ho valór 110. Ho ida-ne’e loloos nia bele hetan, maibé alin la hetan nafatin,” nia akresenta.
Família estudante ne’e dehan, bainhira halo komparasaun valór estudante seluk ne’ebé hetan bolsa méritu, iha estudante ida, Denita Ermianti Fernandes, ho nia valór iha ezame períodu dahuluk hetan valór 109, ezame períodu daruak ho valór 106 no ezame períodu III ho valór 111, enkuantu estudante Georgina Ledi Diana Barreto, ne’ebé hetan bolsa méritu nia valór ba ezame períodu dahuluk 111, períodu daruak 109 no períodu datoluk 110.
“Haree hosi valór ne’e, loloos ha’u-nia alin mós bele hetan tanba nia kolega nia valór kiik liu nia, maibé Adjuntu hatan estudante ne’ebé hetan bolsa méritu ne’e tanba parte eskola soma ona valór, nune’e ha’u hatan sé somativu entaun ha’u-nia alin mós bele hetan tanba haree hosi valór, ha’u-nia alin nia valór liu hela kolega rua seluk,” Sónia tenik.
Nune’e, nia parte tenta husu kaderneta estudante rua seluk ne’ebé hetan bolsa méritu ba parte profesór atu haree sira-nia valór, nune’e bele halo komparasaun ho ninia alin nia valór.
“Buat ne’ebé akontese mak profesór sira uza fali tipe x riska hotu valór sira hanesan 7 muda fali ba 9 no nia totál ne’e muda hotu hodi halo manipulasaun valór sira hanesan tiha alin nia valór. Nune’e, alin nia kolega sira mak hetan fali bolsa méritu, enkuantu alin rasik la hetan tanba razaun alin nia aman serbisu, ida-ne’e laiha razaun forte tanba programa Governu ne’e fó la haree ba profisaun inan-aman nian,” nia lamenta.
Kestaun ne’e Sónia konsidera iha ona manipulasaun tanba kaderneta ne’e nu’udar dokumentu importante ida.
“Ita labele uza tipe x atu riska tun sa’e tuir ita-nia hakarak, ha’u koko hasoru Diretór eskola maibé hatan katak bainhira ha’u la satisfeitu ho rezultadu ne’ebé iha, entaun haruka ha’u hasoru Diretór Edukasaun Munisípial, maibé Diretór hatan dehan, sira laiha kompeténsia atu fó solusaun ba eskola Katólika sira, maibé ba de’it eskola públika,” nia konta tuir.
Notísia relevante: Servisu Edukasaun Munisipál konsidera mosu manipulasaun valór estudante mellór klasifikadu
Nune’e, Diretór Edukasaun Munisípiu Lautém haruka família estudante ne’ebé la simu ho rezultadu, hodi halo justifikasaun razaun la simu ho rezultadu.
“Ha’u ba hasoru fali Diretór eskola atu halo justifikasaun ba alin la liu bolsa méritu, maibé Diretór eskola okupadu no dehan iha tinan foun janeiru 2023 mak atu halo justifikasaun, maibé ikus mai laiha solusaun. Ami husu Ministériu Edukasaun Juventude no Desportu atu tau atensaun maka’as, nune’e labele iha manipulasaun hodi estudante ne’ebé merese atu hetan ne’e tenke hetan tanba nia iha direitu,” nia dehan.
Jornalista : Arminda Fonseca
Editora : Julia Chatarina
