DILI, 11 janeiru 2023 (TATOLI)–Ministru Finansa (MF), Rui Augusto Gomes, kuarta ne’e, aprezenta projetu dekretu-lei kona-ba kriasaun Komisaun Nasionál Aprovizionamentu (CNA, I.P, sigla portugés) no aprova ninia estatutu rasik, iha ámbitu reuniaun Konsellu Ministru (KM).
“Hafoin liu dékada ida dezde kriasaun Komisaun Nasionál Aprovizionamentu no haree ba volume no komplesidade prosedimentu aprovizionamentu ne’ebé halo hosi instituisaun ne’e, nune’e presiza atu aumenta kapasidade jestaun no autonomia atu hasa’e efisiénsia no efikásia aprovizionamentu iha setór públiku administrativu inklui kapasidade resposta,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu.
Notísia relevante: CNA realiza ona konkursu aprovizionamentu ba projetu 237 ho kustu billiaun $1,1
Haree mós ba dekretu-lei númeru 22/2022, loron 11 maiu, alarga ona atribuisaun CNA, ne’ebé importante tebes atu adapta ho natureza no rekursu hosi tarefa ne’e, liuhosi transformasaun ema koletiva públika ida ho forma institutu públiku nian.
Jornalista : Antónia Gusmão
Editora : Julia Chatarina
