iklan

Uncategorized

INDDICA husu PN fó prioridade aprova projetu-lei protesaun ba labarik

INDDICA husu PN fó prioridade aprova projetu-lei protesaun ba labarik

Prezidente Instituto para a Defesa dos Direitos da Criança (INDDICA), Dinorah Granadeiro. Imajen Tatoli/Egas Cristóvão.

DILI, 11 janeiru 2023 (TATOLI)—Prezidente Instituto para a Defesa dos Direitos da Criança (INDDICA), Dinorah Granadeiro, husu ba Parlamentu Nasionál (PN) atu fó prioridade atu debate no aprova projetu-lei protesaun ba labarik no joven iha perigu laran antes mandatu ramata iha tinan ne’e.

Notísia Relevante:  Komisaun F finaliza diskusaun projetu-lei protesaun ba labarik iha espesialidade

“Husu deputadu no deputada sira iha PN katak antes ita-boot sira-nia mandatu ramata bele fó prioridade ikus hodi debate no aprova projetu-lei protesuan ba labarik no joven iha perigu laran, atu nune’e fó duni espasu ba institutuisaun sira-ne’ebé mak halo servisu ba asuntu protesaun no promosaun hodi bele ezerse sira-nia funsaun ho di’ak,” Prezidente INDDICA ne’e hateten ba Agência Tatoli liuhosi programa “Entrevista Eskluziva” iha studio Agência Tatoli, I.P, Faról, Dili, kuarta ne’e.

Tuir nia, projetu-lei protesaun ba labarik no joven iha pergu laran ne’e importante tebes, no PN sempre hakilar katak presiza proteje no promove labarik sira-nia direitu no sai mós slogan ida ba PN katak labarik mak sai futuru nasaun ida-ne’e nian.

“Entaun investimentu ba labarik tenke hahú agora ho labarik idade zero. Investimentu ita halo bainhira iha baze legál sira, tanba ne’e mak liuhosi opurtunidade ida-ne’e, husu nafatin atu tau prioriadde ba asuntu ne’e,” nia dehan.

INDDICA kontinua esforsu hodi hakbesik an no enkoraja labarik sira, nune’e mós halo aproximasaun ba inan-aman sira atu haree labarik sira-nia direitu ne’ebé moris iha dalan ninin.

“Ami kontinua esforsu atu hakbesik ba labarik sira iha dalan ninin ne’ebé mak faan no ami mós aproxima ba sira-nia inan-aman maibé inan-aman dehan mai ami katak ami-nia oan, ami mak manda no Governu atu halo saida ba ami-nia oan. Ida-ne’e sai dezafiu ida ba ami,” nia hateten.

Maibé, nia dehan, INDDICA la’o tuir lei 04/2021 nian no iha konstituisaun RDTL hateten labarik sira tenke hetan direitu espesiál, dahuluk mak família ka inan-aman depois komunidade no sosiedade hafoin mak Estadu

Ho nune’e, nia mós husu ba inan-aman sira katak tenke tau atensaun no iha obrigasaun atu hakonu labarik sira-nia direitu mak investe labarik sira iha edukasaun.

“Husu ba inan-aman nia kosnsiénsia no ita hotu katak ita mak iha papél atu halo protesaun hodi promove ita-nia oan sira. Labele utiliza labarik sira tanba sira moris iha mundu ne’e la’ós sira-nia hakarak maibé ita ema adultu nia hakarak, nune’e ita mak iha obrigasaun atu hakonu sira-nia direitu la’ós sira mak hakonu ita-nia direitu,” nia dehan.

Tanba ne’e, nia enkoraja hela ba labarik sira katak programa Governu nian importante sira hanesan eskola gratuita, ne’e opurtunidade di’ak ba labarik sira katak futuru nasaun iha labarik sira-nia no aproveita opurtunidade ne’e ho di’ak, eskola nune’e hadi’a sira-nia futuru iha tinan oin mai.

Maibé, nia hateten, ba labarik sira-ne’ebé karik hetan violasaun ruma bele komunika ho INDDICA iha MSSI Caicoli, tanba investimentu importante liu mak edukasaun no husu ba labarik sira aproveita oputunidade ne’e ho di’ak.

Dadus labarik iha Timor-Leste iha tinan 2016 ne’ebé Agência TATOLI asesu hosi Inpesaun Jerál Traballu (IGT, sigla portugés) ne’e labarik hamutuk na’in- 421.655.

Atividade ne’ebé labarik sira halo 16,1 % (67.688) nu’udar ekonomikamente ativu mak labarik mane na’in-32.995 no labarik-feto na’in 34.300 no hosi númeru ne’e labarik na’in-62.710 iha área rurál no 4.978 iha área urbana.

Hosi dadus ne’e iha 70,7 % tuir eskola de’it, 13,2% iha empregu no eskola, 2,9% iha empregu de’it no 13,2 % laiha empregu no laiha eskola.

Empregu ba labarik iha atividade ekonómiku mak labarik sira servisu iha to’os no produsaun modo 55,6% (mane 50,9% vs feto 40,1%).

Traballadór servisu doméstiku no restaurante iha 25,9 % (mane 40,2% no feto 59,8%) no labarik sira faan iha Estrada ne’e iha 8,3%.

Notísia Relevante: INDDICA husu PN reajenda-aprova lalais projetu-lei protesaun labarik

Jornalista : Osoria Marques

Editór        : Cancio Ximenes

iklan
iklan

Leave a Reply

iklan
error: Content is protected !!