BAUCAU, 11 janeiru 2023 (TATOLI) – Postu administrativu Baucau vila, munisípiu Baucau seidauk submete relatóriu ba admistrasaun munisipál tanba sei kompleta dokumentu Programa Mão de Obra Postu Administrativu (PMOPA) faze daruak.
Administradór postu administrativu Baucau Vila, Isencinio António da Silva, esplika, ezekusaun orsamentu no atividade ba programa refere finaliza ona iha fulan-novembru tinan-2022.
Notísia relevante: Postu Vemasse finaliza ona PMOPA
“Ita sei kompleta lai foto, dokumentu relevante sira no asinatura hosi xefe suku balun seidauk maibé fulan-janeiru laran ita sei submete ba munisípiu,” Admistradór postu Baucau Vila informa ba Agência TATOLI iha Vila Antiga, kuarta ne’e.
Totál orsamentu ne’ebé aloka ba postu Baucau vila hamutuk $137.41,33 ne’ebé fahé kada faze ezekuta pursentu 50 hosi faze rua ho totál atividade 33 hanesan limpeza jerál, reparasaun estrada no kuda ai-oan iha suku 11.
Autoridade Baucau vila konsidera programa refere fó benefísiu direita ba komunidade tuir matadalan no objetivu PMOPA nian atu rekupera ekonomia iha baze.
Postu administrativu Baucau Vila planeia atu halo atividade tuir kondisaun geografia iha tinan-2023 relasiona ho orsamentu ne’ebé aloka ba PMOPA tinan ne’e ba kada postu administrativu neen hamutuk rihun $100.
“Tinan kotuk rekuperasaun ekonomia maibé tinan-ne’e ita sei haree nia matadalan maibé orsamentu aprovadu ona,” Isencinio da Silva akresenta.
Governu iha tinan-2022 aloka orsamentu hamutuk milaun $7.2 liuhosi transferénsia ba kada konta bankária iha munisípiu tuir dekretu-lei númeru 3/2016, hodi implementa sub-atividade rihun 35 iha territóriu nasionál ne’ebé fó serbisu ba traballadór informal hamtuk rihun 67.
Notísia relevante: Postu Laga submete ona relatóriu PMOPA
Jornalista : Natalino Belo
Editór : Evaristo Soares Martins
