Postu Laga submete ona relatóriu PMOPA
BAUCAU, 10 janeiru 2023 (TATOLI) – Postu administrativu Laga submete ona relatóriu Programa Mão de Obra Postu Admistrativu (POMPA) tinan-2022 ba autoridade munisípiu Baucau.
Administradór postu administrativu Laga, Domingos Loiola Perreira, esplika, postu administrativu Laga remata programa refere iha fulan-novembru no relatóriu ba faze daruak finaliza no submete ona ba administrasaun munisipál.
“Hein atu tau hamutuk ho faze dahuluk hodi halo kompleta relatóriu programa PMOPA tinan-2022 nian,” Administradór Postu Laga informa ba TATOLI iha Vila Nova, tersa ne’e.
Programa refere postu Laga ezekuta atividade hamutuk 51 komposta hosi faze dahuluk 11 no faze daruak 40 hanesan reparasaun estrada, kuda ai-oan no limpeza jerál iha suku ualu ne’ebé envolve traballadór hamutuk 600-resin.
Totál orsamentu hamutuk $26.941, ne’ebé fahe ba faze dahuluk $13.470,50 no faze daruak $13.470,50.
“Agradese ba governu tanba programa ne’e benefísia tebes ba komunidade iha baze, maske osan oituan maibé bele ajuda hadi’a ekonomia uma-laran,” Domingos Perreira akresenta.
Autoridade Laga rekomenda ba governu atu kontinua progroma refere iha kada tinan nune’e postu admistrativu sira hotu iha atividade, liuliu halo programa ne’ebé benefísia direita ba komunidade iha área rurál.
Jornalista : Natalino Belo
Editór : Evaristo Soares Martins
