DILI, 12 janeiru 2023 (TATOLI)—Prezidente Instituto para a Defesa dos Direitos da Criança (INDDICA), Dinorah Granadeiro, hateten iha tinan ida-ne’e INDDICA fó prioridade ba sira-nia polítika atu aumenta rekursu umanu hodi bele apoiu sira-nia ativiade servisu loro-loron nian.
Notísia Relevante: INDDICA husu PN fó prioridade aprova projetu-lei protesaun ba labarik
“Polítika tinan ne’e ba oin mak presiza hadi’a no aumenta rekursu umanu tanba durante ne’e ami-nia rekursu uitoan, entaun difikulta ami-nia servisu iha terrenu liga ba asuntu atu promove no fó protesaun ba labarik,” Dinorah Granadeiro hateten ba Agência Tatoli liuhosi programa “Entrevista Eskluziva” iha studio Agência Tatoli, I.P, Faról, Dili, kuarta ne’e.
Polítika prinsipál daruak mak daudaun ne’e INDDICA dezenvolve hela estratéjia ba tinan lima nian ne’ebé mak sai hanesan matadalan ba INDDICA atu la’o tuir.
Datoluk mak INDICA kapasita sira-nia an atu halo monitorizasaun no implementasuan planu asaun nasionál ba labarik nian mak to’o ohin loron INDDICA haree katak liña ministériu sira seidauk implementa ho di’ak.
Entaun, nia dehan, esforsu ida-ne’ebé INDDICA integra ona markadór labarik iha sistema dalan ba futuru nian.
Tuir nia, ida-ne’e hanesan Trabalho para Casa (TPC) boot ida ba INDDICA atu monitoriza ninia implementasaun liu-liu oinsá mak hakbesik an ba ministéiru sira, enkorja sira nune’e bele implementa oinsá promove no proteje labarik iha Timor-Leste.
“Markadór hanesan indikadór ida atu integra iha sistema dalan ba futuru atu tinan-tinan bele haree liña ministériu xave sira hanesan Ministériu Saúde, Ministériu Justisa, Ministériu Edukasaun Juventude no Desportu no Ministériu Soliadriedade Sosiál no Inkluzuan (MSSI), tau duni planu estratéjia no orsamentu ba asuntu labarik ne’e ka lae, tanba ministéiru haat iha papel importante atu garante implementasaun direitu labarik ne’e,” nia esplika.
Notísia Relevante: INDDICA koordena ho APORTIL kontrola labarik Oé-Cusse halo viajen mai Dili
Jornalista : Osória Marques
Editór : Cancio Ximenes
