VIQUEQUE, 12 janeiru 2022 (TATOLI)—Uma-kain benefisiáriu hamutuk 37 programa Uma Naroman Povu (UNP) +B, hosi Programa Nasionál Dezenvolvimentu Suku (PNDS), iha suku Matahoi, postu administrativu Uatulari, munisípiu Viqueque, simu ona kalen.
“Programa Governu apoiu kalen ba povu hodi hadi’a sira-uma ne’ebé kalen a’at. PNDS distribui iha sesta (06/01) iha suku Matahoi, ne’ebé iha aldeia 12 mak simu kalen hodi hadi’a fali sira-nia uma ne’ebé mak ho kondisaun a’at,” Xefe suku Matahoi, António Amaral, hateten, iha suku Matahoi, kinta ne’e.
Notísia relevante: PNDS distribui kalen ba uma-kain 37 UNP +B iha suku Macadique
Distribuisaun kalen ba benefisiáriu la haree ba kuantidade kalen maibé depende ba medida uma, tanba molok distribui kalen ba uma-kain 37, tékniku PNDS sukat ona medida uma no fahe tuir de’it.
“Ha’u sente kalen ne’ebé benefisiáriu simu ho kualidade di’ak. Bainhira benefisiáriu sira taka uma sei dura ba tempu naruk maka foin a’at, tanba ha’u haree kalen ida agora benefisiáriu sira simu iha loja tahan ida ho folin $20,50,” nia akresenta.
Biban ne’e, Autoridade suku Matahoi husu ba Ministériu Administrasaun Estatál (MAE) atu kontinua programa ba oin.
“Ha’u husu programa ida-ne’e labele para iha tinan ne’e, maibé tenke la’o nafatin hanesan halo uma ba no distribui kalen nune’e povu Timor bele sente kontente,” nia sujere.
Nune’e mós, nia husu ba benefisiáriu sira atu kalen ne’ebé simu ona tenke aselera taka uma.
“Labele simu tiha kalen rai de’it, tanba ekipa suku no PNDS sei la’o tuir hodi haree uma,” nia fó hanoin.
Jornalista : Vitorino Lopes da Costa
Editora : Julia Chatarina
