iklan

DILI, POLÍTIKA

Fevereiru, Komisaun A halo audiénsia públika alterasaun lei Eleitorál ba PN

Fevereiru, Komisaun A halo audiénsia públika alterasaun lei Eleitorál ba PN

Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 12 janeiru 2023 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), tau ona ajenda halo audiénsia públika ho entidade relevante ba alterasaun lei Eleitorál ba Parlamentu Nasionál iha fulan-fevereiru tinan ne’e.

Notísia Relevante: Komisaun A sei fó apresiasaun alterasaun lei eleitorál ba PN

“Ami tau ona ajenda iha fevereiru nia laran, halo diskusaun proposta alterasaun lei Eleitorál ba Parlamentu Nasionál. Ne’ebé, iha audiénsia públika ne’e sei konvida parte Governu, órgaun eleitorál, partidu polítiku, ho sosiedade sivíl balun,” Prezidente Komisaun A, Joaquim dos Santos, informa ba Agência Tatoli liuhosi telefónika, kinta ne’e.

Dadaun ne’e, ajenda komisaun A sei haree rezolve uluk lei importante balun, nune’e ramata fulan oin kontinua kedas diskusaun alterasaun Lei Eleitorál Parlamentu Nasionál nian ne’ebé importante mós relasiona eleisaun parlamentár ne’ebé sei realiza iha tinan ne’e, nune’e presiza aselera aprova lalais antes tama ba eleisaun.

Prezidente komisaun ne’e seidauk bele esplika kona-ba matéria ba alterasaun no iha prosesu diskusaun mak bele fó sai.

Antes ne’e, iha 03 agostu 2022 liuhosi reuniaun Konsellu Ministru (KM), halo aprovasaun ba proposta-lei ne’ebé aprezenta hosi Ministru Administrasaun Estatál, Miguel Pereira de Carvalho, ba alterasaun dalimak ba lei númeru 6/2006, loron 28 dezembru, ne’ebé aprova lei Eleitorál ba Parlamentu Nasionál.

“Projetu ne’e hakarak atu introdús iha Lei Eleitorál ba Parlamentu Nasionál, inovasaun sira ne’ebé introdús ona iha tinan 2011 iha lei Eleitorál ba Prezidente Repúblika, hodi mantein armonizasaun regra sira kona-ba prosesu eleitorál iha órgaun soberanu ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Inisiativa ne’e, inklui mós iha ho regra foun sira kona-ba oráriu funsionamentu sentru votasaun, lisensa ba jornalista iha servisu kobertura jornalístika eleisaun parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-an bazea ba dokumentu identifikasaun pesoál ne’ebé valídu, ka kriasaun figura monitór eleitorál ne’ebé ninia funsaun hanesan ho observadór eleitorál sira.

“Norma balun mós hadi’a, hodi klarifika katak iha asembleia apuramentu nasionál Komisaun Nasionál Eleisaun (CNE, sigla portugés) deside ho definitivamente kona-ba votu nulu sira, no elementu sira-ne’ebé tau iha boletin votu inklui inkluzaun númeru orden hosi kada kandidatura rezultadu hosi sorteiu lista kandidatura sira,” nia dehan.

Aleinde ne’e, adota inovasaun prinsipál ida hosi eleisaun prezidensiál tinan 2021 mak hanesan sentru votasaun paralelu sira, maske ho forma foun, nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oé-Cusse Ambeno (RAEOA).

“Sidadaun eleitór sé de’it ne’ebé inskreve ona iha unidade resensiamentu fora hosi Dili, no ne’ebé la hakarak atu ba vota iha ninia sentru votasaun orijinál rasik, bele inskreve iha sentru votasaun paralelu sira-ne’e,” Portavós Governu esplika

Notísia Relevante: Governu introdús medida foun iha Lei Eleitorál hodi aumenta partisipasaun

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!