DILI, 16 janeiru 2023 (TATOLI)–Vise Prezidente Komisaun Nasionál Eleisaun (CNE), Domingos Barreto, hateten CNE iha ona planu atu halo edukasaun sívika ba eleitór sira iha territóriu nasionál maibé sei hein orsamentu.
“Konforme ami-nia reuniaun kona-ba preparasaun ba eleisaun parlamentár, liga ho edukasaun sívika iha planu ona maibé ita hein orsamentu jerál ba tinan ne’e nian,” Vise Prezidente CNE ne’e hateten ba Agência Tatoli, liuhosi telefónika, segunda ne’e.
Atividade preparasaun iha pre-eleitorá ne’e, nia dehan, CNE sei hein Prezidente Repúblika José Ramos Horta dekreta tiha lai kalendáriu eleitorál mak atividade edukasaun sívika ne’e foin bele hala’o.
“Kuandu osan sai ona mak ita planu para inisíu fulan-fevereiru bele hahú halo edukasaun sívika ba ita-nia sidadaun sira. Ami nia planu ne’e la’o ida ho resensiamentu eleitorál ne’ebé STAE sei halo abertura iha tersa (17/01) aban, maibé orsamentu mós tenke iha para bele halo edukasaun sívika,” nia dehan.
Tanba, tuir nia, CNE nia papél mak halo supervizaun no edukasaun sivika ba votante sira hodi hatene direitu votu iha sentru votasaun-sira no área konflitu sira, nune’e joven-sira konsiente hodi kontribui ba eventu eleisaun mai ne’e.
Diretor Jerál CNE, Deolindo Ramos, hateten totál orsamentu ne’ebé alokadu ba CNE iha tinan 2023 hosi Orsamentu Jeral Estadu nian hamutuk millaun $10,370.732.00.
Aleinde ne’e, CNE mos iha orsamentu adisionál seluk ne’ebé ho kategoria DTG (DOTAÇÃO TUDO GOVERNO) ne’ebé espesifiku de’it ba eleisaun nian, ho nia montante hamutuk $3.000.000.00.
Total orsamentu CNE nian ne’e hamutuk millaun $13,370.732.00 mak sei finansia programa prinsipál ida, sub programa hitu no nia atvidade hamutuk 12, durante eleisaun no pós eleisaun.
Notísia Relevante: Orsamentu CNE millaun $10-resin aprova iha espesialidade ho votu a-favór 60
Jornalista : Osória Marques
Editór : Cancio Ximenes
