DILI, 16 janeiru 2023 (TATOLI)– Prezidente Parlamentu Nasionál (PPN), Aniceto Longuinhos Guterres, segunda ne’e, hasoru malu ho Primeiru-Ministru (PM), Taur Matan Ruak, hodi koordena serbisu, hanesan preparasaun ba Eleisaun Parlamentár ne’ebé sei akontese iha tinan ne’e (2023).
“Eleisaun ne’e kompete ba Prezidente Repúblika mak atu defini maibé tenki ho proposta governu nian, tanba lei ne’e hateten klaru hanesan ne’e. Konstituisaun RDTL dehan, Prezidente Repúblika dekreta loron eleisaun bazeia ba proposta kalendáriu eleitorál hosi governu, entaun lei ne’e la’o hanesan ne’e, agora depende ba governu tanba governu mak realiza eleisaun, governu mak hatene situasaun no kondisaun hothotu preparadu nune’e eleisaun ne’e bainhira loos governu mak hatene”, Prezidente PN, Aniceto Guterres, relata ba jornalista-sira, iha Parlamentu Nasionál, hafoin reuniaun koordenasaun ho Xefe Governu.
Responsável órgaun Soberanu daruak ne’e tenik, maske Xefe Estadu mak iha kompeténsia hodi dekreta loron Eleisaun maibé tuir lei mós, nia (PR) labele ultrapasa tempu normál lejizlatura nian tanba Konstituisaun RDTL hateten, lejizlatura ne’e ninia tinan-lima, kada tinan lima iha sesaun lejizltiva lima, kada sesaun lejiztiva ninia durasaun tinan ida.
“Se no caso iha disolusaun Parlamentu Nasionál entaun Parlamentu eleitu foun ne’e hahú ninia durasaun ida ne’e kompleta de’it sesaun lejiztiva ein kursu, ezemplu iha tinan 2018 iha disolusaun Parlamentu. Parlamentu ida mosu hosi depois eleisaun antisipada ne’e nia kompleta de’it sesaun lejiztiva momentu tinan 2018 la’o hela, katak sesaun lejizlativa ne’e hotu iha 14 setembru, entaun to’o iha loron ne’e, hosi 15 setembru ne’e mak foin sura lejizltura foun”, nia esplika.
Ligadu ho ida ne’e, iha ámbitu hasoru malu entre Prezidente Parlamentu ho Xefe Governu ne’e ko’alia mós kona-ba kestaun refere.
“Ho Primeiru-Ministru ko’alia mós asuntu ne’e maibé ko’alia liu de’it tanba ne’e kompeténsia Governu ho Prezidente Repúblika nian”, nia adianta.
Notísia relevante : https://tatoli.tl/2022/11/10/xefe-estadu-sei-dekreta-kalendariu-elisaun-parlamentar-iha-fevereiru-2023/
Jornalista : Antónia Gusmão
Editór : Rafael Ximenes de A. Belo
