Aldeia tolu iha Ritabou kada família kontribui $100 dada rasik liña elétrika
BOBONARO, 17 janeiru 2023 (TATOLI) – Abitante aldeia tolu kompostu hosi Daitete, Riti-Udu no Ma-Hui ne’ebé pertense ba suku Ritabou, postu administrativu Maliana, munisípiu Bobonaro hola inisiativa kada família kontribui osan $100 hodi dada rasik liña elétrika hahú hosi tinan 2020 to’o 2022.
Xefe suku Ritabou, Maximano dos Santos Araújo, haktuir abitante sira hola inisiativa ne’e tanba dezde tempu okupasaun Indonézia mai to’o agora seidauk asesu liña elétrika hosi programa governu.
Notísia relevante: PM fó orientasaun ba EDTL “tinan ne’e suku hotu tenke asesu enérjia elétrika”
“Agora ema hotu haree parte koléjiu ne’e lakan hotu ona, maibé koléjiu ahi lakan tanba ita-nia komunidade sira mak halo sira-nia kontribuisaun dada rasik, tuir informasaun mai hosi ita-nia komunidade katak, sira kada família kontribui $100, depois sira bele sosa fiu, depois teknikamente sira ko’alia ho parte EDTL mai monta meteran sira-ne’e,” nia informa ba jornalista sira, iha kna’ar-fatin, tersa ne’e.
Nia subliña, totál abitante ne’ebé iha aldeia Daitete na’in-666 ho xefe família 135, Riti-Udu na’in-428 ho xefe família 78 no Ma-Hui na’in-624 no totál xefe fámilia 110.
“Sira-ne’e balu hela iha vila, Daitete nia uma-kain 100-resin mak hela iha ne’ebá, Riti-Udu mós kuaze 50 hanesan no Ma-Hui mós 50 de’it, maibé ba sira-ne’e na’in dada ahi ita seidauk identifika loloos,” nia esklarese.
Xefe suku Maximano mós hatutan, aldeia Maganutu ho totál abitante 542 no uma-kain 120 mós to’o agora seidauk asesu liña eletrisidade maski Timor-Leste restaura independénsia durante tinan 21 ona.
Nia haktuir, abitante sira iha aldeia Maganutu mós iha inisiativa hanesan ho aldeia sira-ne’ebé halibur osan atu dada rasik eletrisidade maibé tanba problema lokalidade aldeia refere dook hosi liña distribuisaun eletrisidade.
“Ita-nia governu halo promesa, promete ba promete iha 2023 ne’e povu hotu-hotu tenke asesu ona eletrisidade, maibé até a data governu seidauk realiza nia promesa, sá tán ita besik ona eleisaun hanesan, dalaruma atu tún fali mai ona mak ne’e, dehan imi hili ami karik sei halo nune’e,” xefe suku ne’e preokupa.
Tuir dadus monografia suku Ritabou iha aldeia 12 ho totál populasaun 7.881 hosi totál xefe família 1.600-resin. Hosi númeru aldeia ualu mak asesu ona enérjia elétrika hosi governu.
Notísia Relevante: 2022, EDTL halakan ona liña eletrisidade ba uma-kain 4.322
Jornalista : Sérgio da Cruz
Editór : Evaristo Soares Martins
