DILI, 17 janeiru 2023 (TATOLI) – Ministru Turizmu, Komérsiu no Indústria (MTKI), José Lucas do Carmo da Silva, hasoru malu ho Primeiru-Ministru (PM), Taur Matan Ruak, hodi relata progresu implementasaun feira lokál ne’ebé realiza, iha Portu Dili, hahú iha 20 dezembru 2022 to’o 20 janeiru 2023.
“MTKI atualiza serbisu balun ba Primeiru-Ministru nu’udar mós rezidente Komisaun Organizadora ba feira lokál ne’ebé realiza ona desde 20 dezembru 2022. Iha 20 janeiru ne’e sei enserra, tanba ne’e ha’u mai hato’o progresu implementasaun ne’e”, ministru hatete ba jornalista-sira hafoin hasoru malu ho Xefe Exekutivu, iha Palásiu Governu.
Iha sorumutu refere, governante ne’e hato’o mós perspetiva públika nian, liuliu benefisiáriu sira ne’ebé hola parte iha atividade ne’e.
“Grupu juventude sira hato’o katak, eventu ne’e nu’udar oportunidade ida di’ak no importante tebes tanba diverte komunidade. Ida ne’e mensajen ida importante tebetebes, mensajen seluk maka ministériu hamutuk ho komisaun organizadora simu hosi benefisiáriu hanesan grupu artezenatu, restaurasaun sira katak sente hetan benefísiu, ezemplu sira ne’ebé fa’an sira-nian produtu bele hetan osan to’o $200 no dalaruma to’o $800 iha oras 24 nia laran”, nia haktuir.
Ho nune’e, benefisiáriu sira ne’e husu ba Governu atu realiza nafatin programa no atividade sira hanesan ne’e para bele ajuda sira.
“Ba oin, ami iha intensaun atu kontinua, maibé realizasaun ba atividade sira ne’e ita implementa bazeia ba despaixu Primeiru-Ministru, ne’ebé eventu ne’e sei taka iha 20 janeiru. Iha ideia ba oin mak haree oinsá iha divertimentu nafatin ba fa’an-na’in, produtór sira iha Dili no bele mós iha munisípiu hodi diverte sira para fó nafatin oportunidade ba produtór lokál sira. Iha hanoin atu hamosu feira iha sesta no sábadu kalan”, nia adianta.
Notícia relevante: Faviola no Martinho sai manán-na’in ba kompetisaun Fashion Show hosi MTKI
Jornalista: Antónia Gusmão
Editora: Maria Auxiliadora
