DILI, 17 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten iha semana ne’e STAE sei rekruta brigada hamutuk 20.575 ba atividade eleisaun lejislataivu tinan 2023.
Notísia Relevante: STAE apela ba sidadaun TL partisipa iha resensiamentu eleitorál
“Ita presiza halo rekrutamentu tuir planu operasaun iha postu to’o suku sira ho brigade hamutuk 20.575. Tanba tuir ita-nia kalendáriu, apartir semana ne’e, ita sei halo rekrutamentu balun ba brigada ne’ebé sai pesoal importante iha sentru votasaun, nune’e mós sei responsabiliza iha postu administrativu,” Acilino Manuel Branco hateten ba Agência Tatoli liuhosi programa Entrevista Eskluziva iha studio Faról, segunda ne’e.
Atividade ida-ne’e mós tama iha siklu pre-eleitorál nian molok tama siklu eleisaun, tanba hirak-ne’e hotu presiza halo preparasaun másimu nune’e iha eleisaun lejislativu ne’e iha kualidade tuir sidadaun nia hakarak.
Tanba, tuir nia, ema hotu hakarak eleisaun lejislativu tinan ne’e tenke ho kualidade, onestidade, armónia no imparsialidade.
Nia hateten, bainhira rekrutamentu ramata sei rekruta tan ofisiál eleitorál sira hodi tau matan iha estasaun votasaun nian iha suku sira hotu iha territóriu nasionál.
“Hafoin ne’e, STAE sei rekruta ofisiál eleitorál hamutuk 18.000 ne’ebá sei servisu iha kada estasaun votasaun,” nia dehan.
Notísia Relevante: Eleisaun parlamentár: STAE-Governu sei kria kondisaun EhD vota mesak
Jornalista : Osória Marques
Editór : Cancio Ximenes
