DILI, 19 janeiru 2023 (TATOLI) – Sekretáriu Estadu Arte no Kultura (SEAK), Teófilo Caldas, relata prosesu konstrusaun Biblioteka Nasionál ba Primeiru-Ministru (PM), Taur Matan Ruak.
Iha sorumutu ne’e, Sekretáriu Estadu informa Xefe Governu empreza sanulu ne’ebé partisipa iha konkursu públiku ne’ebé lansa husi empreza internasionál ENI, maibé iha neen de’it mak tuir prosesu to’o remata no iha pandemia nia laran tolu retira tiha.
“Hela de’it tolu no iha dezembru 2022 avansa ba asina kontratu no empreza vensedora retira tiha fali ho razaun katak inflasaun, katak sasan folin sa’e, no iha sira-nian rain covid-19 sei nafatin”, Teófilo Caldas hateten hafoin hasoru ho Primeiru-Ministru, iha Palásiu Governu.
Nia hatutan hafoin simu razaun sira ne’e, ENI hamutuk ho Autoridade Nasionál Petróleu no Minerál (ANPM) kontinua fali ho kompañia vensedór daruak.
“Ne’ebé semana kotuk ne’e iha steering committee atu haree selebrasaun kontratu, maibé iha difikuldade uitoan, entaun semana-oin sira ne’e bele realiza asinatura. Steering committee ne’e kompostu hosi SEAK, ANPM, ENI, MOP [Ministériu Obra Públika] no ADN [Ajénsia Dezenvolvimentu Nasionál]. Iha ne’e mak ita foin haree desizaun finál ida para fó ona kontratu ba empreza atu asina”, nia adianta.
Bainhira husu kona-ba empreza vensedora daruak, governante ne’e salienta katak seidauk bele fó sai naran no bainhira avansa ba asinatura akordu maka foin bele publika.
Konstrusaun ba Bioblioteka Nasionál ne’e harii iha Hudi-laran, postu administrativu Dom Aleixo, munisípiu Dili no halo ona lansamentu ba hatuur fatuk dahuluk iha 16 agostu 2017 no halo serimónia hanesan iha 22 jullu 2022.
Medida rai ba konstrusaun Biblioteka Nasionál iha 27 mil kuadradu. Empresa Eni assumi kompromisu ba finansia konstrusaun ho millaun $10. Governu mós disponibiliza ona orsamentu adisionál millaun $2,3 ba faze dahuluk konstrusaun nian, diresionadu ba edifikasaun muru no supervizaun ba konstrusaun edifísiu.
Notísia relevante : ANPM atualiza progresu konstrusaun biblioteka nasionál
Jornalista: Antónia Gusmão
Editora: Maria Auxiliadora
