Xefe família 1,492 iha Bobonaro deside la simu subsídiu $200
BOBONARO, 19 janeiru 2023 (TATOLI)-Koordenadór jerál pagamentu subsídiu fim do ano iha munisípiu Bobonaro, Francisco Tilman, haktuir bazea ba dadus ne’ebé tékniku sira rekolla xefe fámilia hamutuk 1,492 deside la simu subsidiu ima-kain fim do ano $200 hosi Ministériu Solidariedade Sosiál no Inkluzaun (MSSI) ba períodu tinan 2022.
Atuál diretór sentru solidariedade sosiál no inkluzaun munisípiu Bobonaro nee esklarese uma-kain aprovadu iha hamutuk 29,972 ho orsamentu $5,994.400.00. Hosi númeru ne’e konsege selu de’it ba benefisiáriu 28,480 ho montante $5,696.000.
Notísia relevante: MSSI husu PM rezolve lista reklamante subsídiu $200
“Ida-ne’ebé governu la selu hamutuk 1,492 ho totál orsamentu ne’ebé ita devolve ba kofre estádu hamutuk $298.400, razaun tanba balu asume kargu xefia ninia vensimentu liu $500, depois membru Polísia Nasionál Timor-Leste (PNTL) ho membru F-FDTL sira no kompañia balun,” nia informa ba jornalista sira, iha kna’ar fatin, Maliana, kinta ne’e.
Xefe família ne’ebé governu la konsege selu mai hosi postu administrativu neen, kompostu hosi postu Atabae na’in-194 ho valor6 orsamentu $38,800, Balibó na’in-119 ho montante $23,800.
Nunee nós postu Bobonaro 213 ho orsamentu $42,600, Cailaco 95 ho orsamentu $19,000, Lolotoe 117 ho totál osan $23,400 no postu administrativu Maliana 754 ho totál orsamentu $150.800.
Nia dehan, ambiente jerál pagamentu subsídiu fim do ano ba uma-kain iha munisípiu Bebonaro la’o di’ak.
“Maibe tuir Provedoria Direitu Umanu no Justisa (PDHJ) nian haree iha diretór balun nomea fali ferik-oan ka sira-nia ona ba foti, prontu ida-ne’e PDHJ ho KAK mak sai halo investigasaun,” nia hatutan.
Nia husu ba xefe família rekalamante sira atu pasiénsia oituan, tanba governu sei esforsu hela atu halo fali pagamentu iha loron tuir mai.
Montante orsmentu ne’e prepara hodi hein ajustamentu dadus fiksu hosi Ministériu Administrasaun Estatál (MAE) no hosi suku sira.
Notísia relevante: Governu sei altera dekretu-lei subsídiu $200 atu selu reklamante sira
Jornlista: Sérgio da Cruz
Editór: Evaristo Soares Martins
