BOBONARO, 21 Janeiru 2023—Prezidente Partidu Congreso Nacionál de Reconstrução de Timorense (CNRT), Kay Rala Xanana Gusmão, deklara iha tempu besik Partidu CNRT sei aprezenta pozisaun ba Prezidente Repúblika, José Ramos Horta, bele dekreta kalendáriu no halais eleisaun parlamentár tuir konstituisaun RDTL haruka.
Partidu CNRT rasik iha foin lalais ne’e, simu ona konvinte hosi PR Ramos Horta hodi marka ajenda atu rona partidu politiku sira-nia pozisaun, antes Xefe Estadu dekreta kalendariu eleisaun parlamentár.
Notísia Relevante: Xanana dezafia kuadru-militante CNRT konsolida partidu hodi manan eleisaun
“Iha loron 06 fevereiru agora, ami sei hasoru prezidente repúblika. Ami ba, ha’u sei ko’alia ho prezidente katak ami-nia pozisaun, ami sei la fó dalan atu adia tan eleisaun. Ami nian mak eleisaun tenke halo agora, atu nune’e ema labele joga iha kotuk-kotuk,” Xanana Gusmão hateten iha serimónia natal konjunta no serimónia agradesimentu ba vitória eleisaun prezidensiál 2022 hamutuk ho militante partidu CNRT iha suku Oeleu, postu administrativu Bobonaro, munisipiu Bobonaro, sesta ne’e.
Xanana dehan, tuir lei bainhira PR Horta rona tiha partidu asentu iha parlamentu nasionál no partidu sira-ne’ebé la asentu inklui organizasaun naun govermentál no sira seluk, prezidente iha kompeténsia atu anunsia ka deside kalendáriu eleisaun parlamentar no data eleisaun.
Entretantu, tuir lei, hafoin prezidente repúblika rona tiha partidu politiku ne’ebé iha asentu parlamentár, determina liuhosi dekretu prezidenaiál, data ba eleisaun deputadu sira ba Parlamentu Nasionál ho antesedensia mínimu loron 80 (baze legál hosi artigu Núemru 17 da Lei Nú 9/2017).
Notísia Relevante: Governu preparadu realiza eleisaun parlamentár
Jornalista : Sérgio da Cruz
Editór : Cancio Ximenes
