DILI, 23 janeiru 2023 (TATOLI) – Sekretaria Estadu Arte no Kultura (SEAK) aloka rihun $100 hodi apoia grupu kulturál no hadi’a uma-lisan hamutuk 200-resin iha tinan 2023.
Ba ajuda ne’e, Primeiru-Ministru (PM), Taur Matan Ruak, bolu Sekretáriu Estadu Arte no Kultura, Teófilo Caldas, hodi husu kona-ba preparasaun sira.
“Xefe Governu mak bolu ha’u hasoru nia hodi atualiza serbisu Sekretaria Estadu Arte no Kultura nian, liuliu serbisu ne’ebé mak halo iha tinan 2023 nian. Daudaun, ekipa halo avaliasaun ba dokumentu ba proposta hosi komunidade hodi halo fali uma-lulik iha 2023 ho grupu kulturál. Hafoin simu [proposta ne’e] ekipa sei tun bá halo verifikasaun depois bele realiza kontratu hodi apoia orsamentu”, Teófilo Caldas hateten, iha Palásiu Governu.
Governante ne’e informa mós ba Xefe Governu kona-ba relatóriu sira ba apoia orsamentu ba komunidade halo uma-lisan iha 2022 no balun seidauk entrega.
“Maioria entrega hotu ona, iha ida ka rua mak seidauk tanba hirak ne’ebé halo uma-lulik, grupu kulturál klásiku sira administrativamente lakoñese saida mak komputadór. Ne’ebé fó toleránsia uitoan ba sira hodi bele husu sira-nia oan nia ajuda ka família ruma hodi bele halo relatóriu”, nia adianta.
Sekretáriu Estadu ne’e afirma, tinan 2023 ne’e tinan polítiku, mandatu Governu hela fulan-neen, entaun tau osan ba programa sira ne’e mós sukat, maibé Ezekutivu foun mai mak hakarak kontinua programa refere bele propoin iha orsamentu retifikativu.
Iha 2022, SEAK aloka rihun $200 ba finansiamentu obra rekonstrusaun no rekualifikasaun uma lulik iha país.
Notísia relevante: SEAK apoiu ona grupu soru tais 37 iha 2022
Jornalista: Antónia Gusmão
Editora: Maria Auxiliadora
