DILI, 14 dezembru 2022 (TATOLI)—Diretór Jerál Sekretáriu Estadu Arte no Kuktura (SEAK), Manuel Ximenes Smith, informa iha tinan 2022 ne’e SEAK apoiu ona grupu soru tais hamutuk 37 iha territóriu laran tomak.
Notísia Relevante: SEAK apoiu grupu soru tais lima iha faze dahuluk
“Iha tinan ida-ne’e, ita fó apoiu ona ba grupu 37 hosi munisípiu hotu,” Manuel Ximenes Smith, hateten bainhira selebra loron nasionál tais liuhosi semináriu ho tema jerál “Ha’u-nia tais mak ha’u-nia identidade lori komunidade ba hadomi tais” ne’ebé hala’o iha Sentru Konvensaun Dili, (CDD, sigla portugés), kuarta ne’e.
Iha Sekretária Estadu Arte no Kultura ka Ministériu Ensinu Superiór Siénsia no Kultura nia polítika mak haree kona-ba oinsá prezerva, proteje, valóriza no promosaun ba identidade kulturál ne’e liuhosi dalan barak hanesan fó nafatin formasaun ba inan soru-na’in sira haree kona-ba oinsá mak inan soru-na’in sira bele kompete iha merkadu.
Polítia ida seluk, mak SEAK enkoraja nafatin inan soru-na’in sira atu bele fó formasaun kontinusauan ba jerasaun foun sira atu kontinua soru tais.
Tanba, nia dehan, SEAK iha fundu atu bele fasilita inan soru-na’in sira iha munisípiu hotu atu bele kontinua sira-nia kna’ar nu’udar soru-na’in.
Polítika ida-ne’e, atu habelar nafatin soru-na’in sira-nia koñesimentu tradisionál ka matenek tradisionál ne’ebé sira prodús rasik, liuhosi sira-nia era bei-ala sira husik hela, atu nune’e bele fó nafatin ba sira-nia jerasaun foun sira atu hatutan.
Notísia Relevante: KNPKI-TL husu Governu dekreta loron 14 dezembru timoroan hotu hatais tais
Maibé, tuir nia, iha problema mak Governu seidauk kria kondisaun ba inan soru-na’in sira liu-liu fatin ba soru tais mak seidauk iha, entaun Governu liuhosi Sekretáriu Estadu Arte no Kultura liuhosi liña ministeriál tenke haree asuntu importante ida-ne’e, nune’e sira nafatin soru iha sira-nia uma.
“Uma mahon oan ida, sira soru dala ruma iha uma-adat nia okos, dala ruma iha fatin ne’ebé seguru ba sira atu hala’o atividade soru tais. Fatin espesífiku ida ba sira atu konsentra hodi fó formasaun no hodi halo soru ba sira-nia jerasaun foun sira-ne’ebé halo tur sira-nia lisan, sira-nia toman ne’e seidauk to’o iha ne’eba,” nia dehan.
Maibé, tuir nia, iha kada tinan Sekretáriu Estadu Arte no Kultura fó apoiu ba inan soru-na’in sira atu kontinua hala’o atividade soru tais hanesan toman ka kultura.
“Kada tinan ita fó ba inan soru-na’in sira, kada grupu soru-na’in $2.000, hotu-hotu tau hanesan. Ha’u hatene di’ak loos, katak balun hetan no balun seidauk hetan maibé sira-ne’ebé seidauk hetan ne’e oportunidade hetan nafatin. Karik Sekretáriu Estadu Arte no Kultura liuhosi Ministériu Ensinu Superiór Siénsia no Kultura iha VIII Governu Konstitusionál, ita mantein pozisaun atu fó nafatin tulun ba inan soru-na’in sira ba grupu kulturál komunitáriu no mós grupu indústria kreativa sira inkluindu ita-nia uma-lulik sira iha teritóriu nasionál,” nia dehan.
Notísia Relevante: Governu sei responsabiliza tais 317 hosi grupu soru tais 10 RAEOA
Jornalista : Nelia Fernandes
Editór : Cancio Ximenes
