Atu evita votu nulu-branku presiza halo mudansa ba lei eleitorál

DILI, 26 janeiru 2023 (TATOLI)—Prezidente Komisaun Nasionál Eleisaun (CNE), José Agostinho da Costa Belo, hateten atu evita votu nulu ho branku presiza halo mudansa ba lei eleitorál nune’e bele ajuda iha eleisuan parlamentar ne’e.
Notísia Relevante: Fevereiru, Komisaun A halo audiénsia públika alterasaun lei Eleitorál ba PN
“Atu evita votu nulu ho branku presiza halo mudansa ba lei eleitorál tanba iha ami-nia kestiona katak votu nulu atu di’akliu fó nafatin mai apuramentu nasionál. Nune’e ita ho brigada no ofisiál eleitorál bele loke fali, nune’e haree tanba dala barak ferik katuas sira tuu ho intensaun ne’ebé loos maibé tauk no teknikamente dada entaun sala tiha. Tanba ne’e mak presiza iha mudansa ba lei eleitorál hodi bele ajuda ita,” Prezidente CNE ne’e hateten ba Agênci Tatoli, liuhosi telefónika, kinta ne’e.
Tuir nia, votu nulu presiza haree no konfirma fila-fali tanba iha eleisaun Prezidensiál tinan kotuk votu nulu kuaze rihun lima (5.000) maibé bainhira CNE verifika didi’ak kuaze rihun 3 mak validu.
“Ida-ne’e ami fó hatane hela, nune’e deputadu no deputada sira haree no fó dalan,” nia dehan.
Diretór Jerál Sekretariadu Tékniku Adminsitrasaun Eleitorál (STAE), Acilino Manuel Branco, hateten ho nune’e mak STAE halo rekrutamentu ba brigada ho ofisiál eleitorál sira, nune’e sira mós sei hetan formasaun hosi STAE kona-ba oinsá mak atu vota ba kandidatura ida.
“Iha eleisaun parlamentár tinan ne’e, ita hakarak evita votu nulu no branku ne’e mak halo rekrutamentu no bainhira ramata ona, ita sei fó formasaun ba sira nune’e sira mós iha koñesimentu atu bele hanorin fali eleitór, nune’e labele iha votu nulu,” nia dehan.
Maibé la’ós de’it STAE ho CNE mak tenke fó edukasaun votante no edukasaun sívika ba eleitór maibé partidu politiku sira mós tenke hanorin ona sira oinsá mak vota.
“Ita mós husu ba partidu polítiku sira atu halo edukasaun ba sira-nia militante sira ho loloos no ba ema-ne’ebé mak nia sei hili, nune’e bele vale,” nia hateten.
Tanba dala barak votu nulu ka la vale mak barak, nune’e presiza halo kampaña sensibilizasaun ba eleitór sira ho másimu atu nune’e votu mós vale, ezemplu hanesan STAE hetan iha eleisaun prezidensiál ne’e eleiór ida vota no vistu iha kandidatura ida-nia foto depois nia asina tan no dehan ‘ha’u gosta nia’, ida-ne’e la vale ona.
“Maibé ami hamutuk ho birgada no CNE sei halo kampaña eletorál ne’ebé másimu, maibé mídia ho partidu polítiku mós importante hodi halo edukasaun ne’ebé ho loloos ba ita-nia elitór sira, nune’e bainhira nia la’o dook ba vota karik tenke vale,” nia esplika.
Notísia Relevante: Governu ho komisaun A hahú diskute alterasaun lei Eleitorál ba PN
Jornalista : Osória Marques
Editór : Cacio Ximenes

