DILI, 30 janeiru 2023 (TATOLI)– Vise-Primeiru-Ministru no Ministru Planu no Ordenamentu (MPO), José Reis, entrega dokumentu sobre estabelesimentu Planu Nasionál Ordenamentu Timor-Leste (PNOT-TL) ba Primeiru-Ministru (PM),Taur Matan Ruak.
Dokumentu ne’e entrega iha ámbitu reuniaun semanál ho Xefe Ezekutivu, iha Palásiu Governu.
“Ha’u entrega ba Primeiru-Ministru dokumentu sira ne’ebé mak prodús hosi Planu Nasionál Ordenamentu Timor-Leste hanesan relatóriu ba iha diágnostika, karaterizasaun, modelu ordenamentu no planu asaun”, José Reis dehan.
PNOT-TL daudaun iha hela prosesu konsulta durante loron 60 tanba ejize hosi rejime jurídiku ba iha instrumentu planu ne’ebé kritériu ne’e obrigada atu iha audiénsia. Tanba ne’e maka ba oin sei iha audiénsia públika pasiva no ativa.
Notísia relevante: https://tatoli.tl/2022/02/09/governu-determina-elaborasaun-pnot-tl/
“Audiénsia pasiva signifika katak sei hatuur iha site no foin lalais anunsia ona liuhosi Jornal Repúblika. Sé mak iha opiniaun ba ezbosu ne’ebé prepara no ida ativa mak tun bá terrenu hanesan halo iha nível rejionál, hanesan iha munisípiu Manatuto, Ainaro no Liquiçá”, nia afirma.
Aléinde ne’e, Governu mós sei husu opiniaun hosi akadémiku sira iha ámbitu konsulta públika molok lori bá Konsellu Ministru hodi halo aprovasaun hanesan dekretu-lei ba iha PNOT-TL ne’e rasik.
Iha 2022, Konsellu Ministru aprova Projetu Rezolusaun Governu determina elaborasaun PNOT-TL.
Notísia relevante: https://tatoli.tl/2023/01/26/tempu-badak-governu-sei-aprova-planu-nasional-ordenamentu-territoriu-timor-leste/
Jornalista : Antónia Gusmão
Editora: Maria Auxiliadora
