Membru PN preokupa kazu Padre Abito nia mate
DILI, 31 janeiru 2023 (TATOLI)—Membru Parlamentu Nasionál (PN) preokupa ho kazu Padre Abito José Brites Casimeiro nia mate iha Dare, ne’ebé ninia prosesu investigasaun to’o agora laiha rezultadu ne’ebé klaru.
Notísia Relevante: PCIC seidauk finaliza kazu Padre Abito
“Kazu Amo Abito Brites nia mate to’o oras ne’e laiha rezultadu investigasaun, ne’ebé informa ba família maske parte saúde halo ona autópsia ba matebian nia mate-isin no investigasaun maibé laiha rezultadu,” Deputadu CNRT, Domingos Lemos, levanta liuhosi reuniaun plenária PN, tersa ne’e.
Tan ne’e, nia husu parte justisa presiza fó atensaun haree prosesu kazu ne’ebé la’o kle’ur ona no to’o agora laiha informasaun klaru.
Deputadu KHUNTO, António Verdiál, hateten parte relevante presiza serbisu ho di’ak nune’e bele fó satisfasaun ba família vítima kona-ba kazu Amo Abito nia mate ne’ebé to’o oras ne’e nia prosesu laiha rezultadu maske kazu ne’e kle’ur ona.
Antes ne’e, Portavós Polísia Sientífika Investigasaun Kriminál (PCIC, sigla portugés), Octavio da Costa Araújo, hateten investigasaun ba kazu Amo Abito José Brites Casimeiro nia mate PCIC seidauk finaliza prosesu investigasaun.
Amo Abito José Brites Casimeiro mate iha kazu asidente tráfegu ida iha Dare, postu administrativu Vera Cruz, munisípiu Dili iha segunda (22/8) ho motorizada Jupiter MX ho xapa-matrikula E 8081 hetan asidente tráfegu hodi rezulta Amo Abito José Brites Casemeiro lakon vida inklui sidadaun fetoida hetan kanek kmaan.
“Relasionaa ho Amu Abito nia kazu, konforme tuir lei ne’ebé atribui kompeténsia ba PCIC, momentu ne’ebá hafoin ita elabora tiha auto-notísia ba Ministeriu Públiku no MP delega fila-fali mai PCIC hodi PCIC halo kontinua prosesu no prosesu ne’e to’o ona iha ne’ebé, la’o oinsá, ida-nee segredu no ami labele fó hatene. Maibé tuir prosesu sedu ho tarde sei iha desizaun finál hosi Tribunál,” Portavóz PCIC, Octavio da Costa Araújo, hateten.
Nia dehan, daudaun ne’e PCIC kontinua halo investigasaun ba kazu ne’e rasik atu kle’ur ka lae ne’e, Ministériu Públiku mak sei tempu ba PCIC hodi konklui nia prosesu investigasaun.
“Ha’u hanoin prazu ba investigasun ne’e depende ba Ministériu Públiku, sira mak sei fó tempu ba investigadór PCIC hodi halo prosesu ba kazu ida-ne’e,” nia hateten.
Notísia Relevante: MP delega kompeténsia ba PCIC investiga kazu Padre Abito Brites nia-mate
Jornalista : Nelson de Sousa
Editór : Cancio Ximenes
