MP delega kompeténsia ba PCIC investiga kazu Padre Abito Brites nia-mate
DILI, 04 outubru 2022 (TATOLI)— Ministériu Públiku (MP) liuhosi Prokuradór Titulár, Jacinto Babo, delega ona kompeténsia ba Polísia Siéntifiku Investigasaun Kriminál (PCIC, sigla Portugés), hodi kontinua loke investigasaun ba kazu asidente tráfegu ne’ebé hamate Padre Abito José Brites Casimeiro, iha area Dare, Postu Administrativu Nain-Feto, Munisipiu Dili, segunda (22/8).
Notísia relevante: Fulan ne’e, MP halo inkéritu ba kazu Padre Abito Brites nia-mate
“Ministériu Públiku delega ona kompeténsia ba Polisia Siéntifika Investigasaun Kriminál (PCIC, sigla portugés) atu kontinua loke investigasaun ba kazu Padre Abito Brites nian-mate, ne’ebé ita hein prosesu investigasaun de’it,” hateten Prokuradór Titulár Jacinto Babo, ba Agência TATOLI via telefónika, tersa ne’e.
MP fó kompeténsia ba PCIC atu investiga kazu ne’e liuliu haree bá motivu hosi Padre nia-mate no sei halo ezamesaun ba iha materiál sira ne’ebé antes ne’e ekipa rekolla iha fatin akontesimentu
“Ita mós sei rona parte hotu, liuliu família vitima,” nia afirma
Notísia relevante: PCIC submete ona rezultadu autópsia mate-isin Padre Abito Brites ba MP
Hataan ba prazu investigasaun ba kazu ne’e, Prokuradór Titular ne’e dehan, tuir lei normálmente investigasaun ba kazu sira hanesan ne’e iha prazu loron 30.
Maibé, iha prosesu ne’e depende ba PCIC atu halo investigasaun mak liu prazu loron 30, tuir lei PCIC bele husu tán fila fali tempu, kuandu investigasaun ne’e seidauk konklui.
“Tanba ba kazu sira hanesan ne’e ba ita tempu la importante, importante maka oinsá ita halo investigasaun ho di’ak,” nia afirma.
Notísia relevante: PNTL kontinua buka sasin ba Padre Abito Brites nia-mate
Jornalista: Natalino Costa
Editór : Florencio Miranda Ximenes
