MSSI rekruta pesoál rejistu ‘bolsa da mãe jerasaun foun’ hamutuk 135
DILI, 31 janeiru 2023 (TATOLI)–Diretór Jerál Ministériu Solidariedade Sosiál no Inkluzaun (MSSI), Florêncio Pina Diaz Gonzaga, dehan programa bolsa da mãe jerasaun foun ne’ebé mak implementa iha munisípiu haat ne’e MSSI rekruta pesoal rejistu hamutuk 135.
Notísia Relevante: MSSI atualiza dadus benefisáriu “bolsa da mãe jerasaun foun” 15.141
“Ita halo ona rekrutamentu ba pesoal rejistu ba bolsa da mãe jerasaun foun ba munisípiu Covalima, Liquiça, Manatuto no Viqueque nian hamutuk 135 ne’ebé sei halo servisu iha postu saúde sira,” Florêncio Pina Diaz Gonzaga hateten ba Agência Tatoli, iha nia knar fatin Caicoli, Dili, tersa ne’e.
Nia hatutan, prosesu rekrutamentu no entrevista ba aplikante sira-ne’e konklui ona no agora hein atu fó sai de’it naran no iha fulan-fevereiru nia-laran rejistu hahú ona loke ba inan isin-rua no ba labarik idade 0-6.
Governu aloka osan ba munisípiu haat inklui ho munisípiu tolu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) hamutuk millaun $13,7.
Programa ida-ne’e implementa bazea ba dekretu-lei 22/2021, 10 novembru, katak iha tinan 2022 MSSI sei implementa programa bolsa da mãe jersaun foun ba iha Ainaro, Bobonaro ho RAEOA, depois iha tinan 2023 ne’e sei habelar no haluan tan ba munisipiu Liquiça, Covalima, Manatuto no Viqueque.
Programa bolsa da mãe jerasaun foun ne’e sei introdús fazeadamente to’o tinan 2025 iha territóriu nasionál.
Notísia Relevante: MSSI rekruta pesoál rejistu “bolsa da mãe jerasaun foun” faze daruak
Jornalista : Osória Marques
Editór : Cancio Ximenes
