Deputadu PD propoin estabelese sentru votasaun paralelu iha munisípiu
DILI, 01 fevereiru 2023 (TATOLI)—Deputadu hosi bankada PD iha Parlamentu Nasionál (PN), Adriano do Nacimento, hateten proposta hodi propoin iha proposta alterasaun lei Eleitorál ba Parlamentu Nasionál, atu estabelese sentru votasaun paralelu iha munisípiu hodi fasilita eleitór sira vota iha eleisaun parlamentár 2023.
Notísia Relavante: Governu ho komisaun A hahú diskute alterasaun lei Eleitorál ba PN
“Hosi ha’u-nia pontu de vista, atu propoin mós iha espesialidade, ha’u lahatene kolega Deputadu sira seluk aseita ka lae, atu estabelese mós sentru votasaun paralelu iha munisípiu 13. Tanba, atu akomoda ba ema sira-ne’ebé hala’o negósiu iha munisípiu ida ba munisípiu seluk sira labele fila, tanba sira-nia sasán ema seidauk sosa hotu ka estudante sira iha munisípiu ne’e tanba sira balun hosi postu ka suku do’ok mai eskola ne’ebé hela iha kost de’it. Entaun, sira labele ba fali sira-nia postu no suku sira tanba dook no kustu. Ita labele hanoin eleisaun hodi halakon fali fó pezu finanseiru ba ita-nia sidadaun hasai fali sira-nia osan ba eleisaun, entaun ita hatodan liután povu kiik,” Deputadu Adriano hateten ba Agência TATOLI iha PN, kuarta ne’e.
Iha audiénsia alterasaun lei eleitorál ba Parlamentu Nasionál ne’e parte bankada PD hato’o ona hanoin ne’e no iha debate espesialidade sei hato’o proposta, hodi propoin sentru votasaun paralelu iha munisípiu sira tanba eleisaun ne’e Governu mak hasai osan la’ós povu mak hasai hodi bele fasilita povu besik ba vota.
Deputadu Adriano mós hanoin propoin atu loke sentru votasaun iha Indonézia, ne’ebé foin daudaun diskute no deputadu balun preokupa seidauk to’o tempu tau sentru votasaun tanba kestaun manipulasaun.
Maibé, nia dehan, iha mekanizmu liu-liu maluk timoroan sira-ne’ebé ba hala’o estudu hodi pasaporte, Indonézia iha nia sistema laiha dupla sidadania entaun nia hatudu pasaporte hanoin bele.
“Hanoin ida-ne’e, depois diskusaun iha espesialidade halo proposta liu ka lae, ita lahatene maibé ami-nia intensaun atu akomoda eleitór sira hotu labele esklui, agora ita bele loke iha Austrália, Portugál, Irlandia, Korea Súl, nusa mak Indonézia labele loke. Indonézia ne’e mak timoroan barak iha ne’ebá liu-liu sira-ne’ebé iha osan natoon eskola iha ne’eba povu babain nia oan,” nia dehan.
Deputadu membru komisaun A trata asuntu Justisa no Konstituisionál ne’e hateten, iha proposta lei ne’e Governu mós hakarak estabelese postal voting iha diaspora, ida-ne’e sei fasilita mós eleitór sira.
Deputadu hosi bankada opozisaun ne’e, konsidera proposta alterasaun lei Eleitorál ne’ebé aprezenta hosi Governu importante ba alterasaun iha kestaun téknika buat balun regulariza iha eleisaun, hanesan oinsá akomoda ema ho defisiénsia sira-nia direitu atu vota ita labele esklui sira.
Nune’e mós, hanoin oinsá akomoda partisipasaun sidadaun ka eleitór sira hotu iha eleisaun parlamentár, presiza akomoda sentru no estasaun votu tenke hakbesik ba povu.
“Faktu hatudu iha eleisaun sira liubá iha ema lubun ida mak la ba vota, entaun presiza altera hodi akomoda aumeta tan sentru no estasaun votasaun hodi hakbesik ba eleitór hodi sira bele fó sira-nia votu,” nia hateten.
Entertantu, proposta alterasaun lei Eleitorál ba Parlamentu Nasionál komisaun A trata asuntu Justisa no Konstituisionál hala’o ona audiénsia públika ho Ministru Administrasaun Estatál (MAE), Miguel Ferreira de Carvalho, órgaun eleitorál Sekretáriadu Tékniku Administrasaun Eleitorál (STAE), Komisaun Nasionál Eleisaun (CNE, siglá portugés), bankada parlamentár, no daudaun kontinua audiénsia ho organizasaun ema ho defisiénsia no parte relevante seluk.
Notísia Relavante: STAE sei estabelese sentru paralelu iha eleisaun parlamentár 2023
Jornalista : Nelson de Sousa
Editór : Cancio Ximenes
