CNRT husu Governu aumenta sentru votasaun hasa’e taxa partisipasaun
DILI, 02 fevereiru 2023 (TATOLI)—Vise Bankada Congresso Nacional de Reconstrução Timorense (CNRT) iha Parlamentu Nasionál, Deputadu Patrocínio Fernandes, husu Governu atu aumenta no estabelese sentru votasaun ho estasaun votu iha eleisaun parlamentár 2023 atu hasa’e taxa partisipasaun.
Notísia Relevante: Deputadu PD propoin estabelese sentru votasaun paralelu iha munisípiu
“Ha’u hanoin presiza aumenta sentru votasaun, tanba ita hakarak hasa’e taxa partisapasaun ba eleisaun ninian. Ita mós hatene ita-nia jeográfia dalaruma hosi suku ida de’it, ita atu kobre de’it suku ne’e hosi aldeia ida ba aldeia ida seluk lori distánsia dook tebes ho mós kondisaun Estrada ne’ebé aat. Ne’ebé, hanoin mekanizmu sira atu aumenta tan sentru no estasaun votu ne’e opsaun ida pertinente,” Vise bankada CNRT ne’e hateten ba Agência Tatoli iha PN, kinta ne’e.
Entretantu, vise bankada CNRT ne’e seidauk bele ko’alia detallu substánsia proposta alterasaun lei Eleitorál ba Parlamentu Nasionál ne’ebé Governu aprezenta mai iha PN atu halo alterasaun, tanba daudaun ne’e iha faze audiénsia públika hosi komisaun A trata asuntu Justisa no Konstituisionál, ne’ebé seidauk diskute iha faze jeneralidade.
Tanba ne’e, nia fó hanoin balun bainhira iha diskusaun iha faze espesialidade ba alterasaun lei ne’e oinsá rekomenda Governu kria mekanizmu sira liután, hanesan aumenta sentru votasaun no estasaun votu hakbesik ba iha povu iha eleisaun parlamentár hodi fasilita eleitór sira atu vota.
“Alterasaun lei ne’e presiza reforsa iha ne’ebé, orsida tama iha espesialidade mak ami sei fó komentáriu,” nia hateten.
Iha lei Eleitorál Parlamentu nasionál ne’e regula hotu ona ko’alia kona-ba direitu ba ema ho defisiénsia sira integradu. Maibe presiza tan mekanizmu sira seluk.
“Agora presiza tan mekanizmu sira seluk, ezemplu buletin votu. Ema barak ko’alia kona-ba bulletin votu braille ba ema ho defsisénsia matan sira. Maibé ema ho defisiénsia hotu iha Timor laran ne’e, sira asesu ba buat ne’e maibé oinsa akomoda direitu ema hotu nian hodi sira bele asesu no ezerse sira-nia direitu polítiku entermu mekanizmu oinsá mak fasilita,” nia hateten.
Nia hateten, substánsia ba proposta alterasaun lei Eleitorál ba PN ne’e parte bankada sei fó hanoin iha debate tuir mai.
Notísia Relevante: Eleisaun lejislativa: STAE sei estabelese sentru votasaun 237-estasaun votasaun 320-resin
Jornalista : Nelson de Sousa
Editór : Cancio Ximenes
